Փաստ ինֆո

ՀՀ ոստիկանության համակարգի ՁՊՎ-ների գործունեությունը կանոնակարգվում է «Ձերբակալված և կալանավորված անձանց պահելու մասին» ՀՀ օրենքով և ՀՀ կառավարության 05.06.2008 թ. «ՀՀ ոստիկանության համակարգում գործող ձերբակալվածներին պահելու վայրերի» ներքին կանոնակարգը հաստատելու մասին թիվ 574-Ն որոշմամբ, տեղեկացնում են ՀՀ ոստիկանության հասարակայնության հետ կապերի և լրատվության վարչությունից:

«Ձերբակալված և կալանավորված անձանց պահելու մասին» ՀՀ օրենքի 33 հոդվածի համաձայն` ձերբակալված անձինք ենթարկվում են անձնական խուզարկության՝ նույն սեռին պատկանող անձանց կողմից:

Սակայն օրենքի տառից մինչև իրականություն երկար ճանապարհ է, հատկապես երբ խոսքը վերաբերում է մարզերին, ուր կան բազում խնդիրներ:

«Մարզային ՁՊՎ-ներում կան խնդիրներ, որոնք կլուծվեն մարզային ՁՊՎ-ները միավորելու դեպքում»,- կարծիք է հայտնում Ոստիկանության համակարգի ձերբակալված անձանց պահելու վայրերում վերահսկողություն իրականացնող հասարակական դիտորդական խմբի ղեկավար Սուրեն Իսկանդարյանը:

Օրինակ՝ հետաքրքիր է, թե մարզային ՁՊՎ-ում ձերբակալված կանանց խուզարկելու հարցն ինչպես է կազմակերպվում:

Ոստիկանությունից «Pastinfo.am»-ին տեղեկացրեցին, որ մարզային վարչությունների ենթակա բաժիններում ձերբակալվածների անձնական խուզարկությունը կազմակերպվում է բաժնի օպերատիվ հերթապահի կողմից: Ձերբակալված կանանց խուզարկությունը իրականացվում է բաժնում ծառայող կին ոստիկանների կողմից, իսկ Երևան քաղաքի ՁՊՎ-ում` հաստիքային կին ծառայողների կողմից:

Սակայն ուսումնասիրությունները ցույց են տվել, որ իրականությունը ոչ միշտ է այդպես:

«Արձանագրությունների մեջ տեսել ենք, որ կին է խուզարկություն իրականացրել, հարցրել ենք ով է, ասել են հավաքարարն է խուզարկել»,-ասում է Ս. Իսկանդարյանը:

«Փաստորեն հավաքարարը կատարում է ոստիկանի գործը, որը խիստ մասնագիտական մոտեցում է պահանջում: Բացի այդ, հավաքարարի խուզարկության ժամանակ պետք է ոստիկանը հսկի նրանց, որը նորից տղամարդ է»,- ասում է նա:

ՀՀ ոստիկանության մեկնաբանության համաձայն՝ Երևան քաղաքի վարչության ՁՊՎ-ում, որն ունի բաժնի կարգավիճակ, ծառայում են 3 կին ոստիկաններ, որոնցից մեկը կրտսեր տեսուչ բուժակ է։

ՀՀ ոստիկանության մարզային վարչությունների ենթակա բաժինների ՁՊՎ-ներն ունեն մեկ պետի և 4 ոստիկանի հաստիք, ովքեր աշխատում են 24 ժամ հերթափոխով։ Յուրաքանչյուր օր ՁՊՎ-ում ծառայություն է կատարում կրտսեր խմբի մեկ ոստիկան:

«Խնդիր կա կանանց պահելու մասով ևս: Մարզերում հերթապահ ոստիկանները տղամարդիկ են: Ենթադրենք՝ կինն ուզում է լոգանք ընդունել, բայց հերթապահ ոստիկանը տղամարդ է և պետք է հետևի, որ ձերբակալված կինն ինքն իրեն չվնասի, դա նորմա՞լ է արդյոք: Ստացվում է զավեշտալի իրավիճակ, բայց սա է այսօր մեր ունեցած հնարավորությունը»,- ասաց է Ս. Իսկանդարյանը: