Փաստ ինֆո

Մենք հիմա ոչ թե փորձում ենք մարդասպանների, դաժան հանցագործություն կատարած մարդկանց համար լավ կյանքի հրաշալի պայմաններ ստեղծել, այլ փորձում ենք ստեղծել արդարացի համակարգեր, որպեսզի 18 տարեկանում մարդ սպանած անձնավորությունը մինչև կյանքի վերջ չհայտնվի բանտում և չհավասարվի նրա հետ,  ով 10 մարդու է սպանել նույն իրավիճակում: Այսօր այս մասին «Ցմահ դատապարտյալների հիմնախնդիրները» թեմայով հրավիրված միջազգային համաժողովի ընթացքում նշեց Մարդու իրավունքների պաշտպանի Կարեն Անդրեասյանը, ավելացնելով, որ ցմահ ազատազրկվածներ իրենք էլ հասկանում են, որ պետք է լինի տարբերակված մոտեցում:

«Երբ մենք զրուցում էին ցմահ ազատազրկվածների հետ, նրանք ասում էին` ես արժանի եմ այս պատժին, բայց հարևան բանտախցում նստածը, ով 18 տարեկանում մեկ հանցագործություն է գործել, արժանի չէ, որ ամբողջ կյանքը կործանվի»,- նշեց Կ. Անդրեասյանը:

Ըստ նրա` մեզանում բացակայում է արդար տարբերակված մոտեցումը: Բայց հիմա քանի որ արդեն կա հասարակական պահանջ, քաղաքական որոշ գործիչների և ուժերի հետաքրքրություն, ՄԻՊ գրասենյակը փորձելու է անհատապես ուսումնասիրել 104 ցմահ դատապարտվածներից յուրաքանչյուրի գործը և միաժամանակ օրենսդրական հստակ առաջարկություն ներկայացնել:

«Երեկ ԱԺ-ում տեղի ունեցած խորհրդարանական լսումների ժամանակ տեսանք, որ վերջապես պատգամավորները համաձայն են լսել մեր առաջարկները: Մենք էլ փորձում ենք երկաթը տաք-տաք ծեծել ու արագ ներկայացնել մեր առաջարկները»: Կ. Անդրեասյանի խոսքով՝ նախագիծը գրելու համար երկու շաբաթը բավարար է:   «Բայց թե ինչքան ժամանակ կտևի, որ ԱԺ-ն ընդունի և իրականություն դարձնի այն` մեզանից կախված չէ: Եթե հասարակությունը հետաքրքրվի, ճնշի, քաղաքական գործիչները կշարժվեն, կշարժվի նաև իրավական համակարգը: Հուսանք սա մի դրամաշնորհ ով ծրագիր չէ, որի շուրջ աշխուժություն է առաջացել, մենք էլ ոգևորվել ենք: Եթե այստեղ ոչ ոք իր մտահոգությունը չի կեղծում` մենք կունենանք լուրջ հումանիստական զարգացումներ մեր երկրում»:   

«Այսօրվա համաժողովը երեկվա խորհրդարանական լսումների ավելի փորձագիտական շարունակությունը կարծես լինի: Ես որպես Եվրոպայի խորհրդի խորհրդարանական վեհաժողովում հայկական պատվիրակության անդամ` հետևողական եմ լինելու, որպեսզի այս խնդիրները լուծում ստանան»,- նշեց ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը` ընդգծելով, որ չի ցանկանում, որ Եվրոպայի խորհրդի նախարարների կոմիտեն որևէ հանձնարարականում այս համատեքստում հերթական անգամ անդրադառնա Հայաստանին: Ն. Զոհրաբյանը տեղեկացրեց, որ հանդիպել  են ցմահ դատապարտյալների հետ. «Ինքս լրջագույն խնդիրներ եմ տեսնում: Մեր հանդիպումները պարբերական են լինելու, հատկապես զինծառայողների մասով: 15 զինծառայող դատապարտված են զինծառայության ընթացքում սպանությունների համար: Մեր հանձնաժողովի պատգամավորները հիմա զբաղվում են այդ խնդրով»: