Փաստ ինֆո

«Խորհրդարանական մեծամասնության բոյկոտը շատ ավելի մեծ պարտություն է, քան եթե գային, մասնակցեին արտահերթ նիստին և եթե նույնիսկ անցներ օրենքը»,- «Փաստինֆո»-ի թղթակցի հետ զրույցում կարծիք հայտնեց Ազգային ժողովի դարպասի մոտ ակցիային մասնակցող նախկին պատգամավոր Աշոտ Սարգսյանը` անդրադառնալով ՀՀԿ-ի կողմից խորհրդարանական ընդդիմության նախաձեռնությամբ հրավիրված նիստի տապալմանը:

«Հայ ազգային կոնգրես» խմբակցության քարտուղար Արամ Մանուկյանն էլ հայտարարեց, որ իրենք շահագրգռված էին, որ քննարկումը կայանա: «Լևոն Զուրաբյանը նախօրեին նաև հայտարարեց մի քանի կետերի փոխզիջման մասին, որպեսզի հնարավորություն ստեղծվի ՀՀԿ-ի համար գալ, մասնակցել, ներկայացնել իրենց փաստարկները»,-ասաց նա` հավելելով, որ քննարկումը կայանալու դեպքում ՀՀԿ-ականները «քվեարկությամբ կարող էին ոչնչացնել ցանկացած  առաջարկ»:

«Ես կարծում եմ` հիմա առավել ևս, բացի Հանրապետական կուսակցությունից, մնացած քաղաքական ուժերը պարտավոր են և ավելի հակված կլինեն միասնական ծրագիր մշակելու, պատրաստվելու առաջիկա նախագահական ընտրություններին` միասնական բազայով, միասնական մոտեցումով, միասնական ծրագիր ունենալով»,-եզրակացրեց Ա. Մանուկյանը:

ՀՅԴ խմբակցությունը, ըստ Արմեն Ռուստամյանի, պատրաստվում է դիմել ԱԺ էթիկայի հանձնաժողով, քանի որ կարծում է, որ հանրապետականները իրենց վարքագծով «խախտել են պատգամավորի պարտավորությունները և, բնականաբար, էթիկայի կանոնները, նաև խախտում կա` կապված ԱԺ-ի նիստերը գումարելու պարտավորության հետ»:

«Այն, ինչ որ կատարեցին իրենք, շատ ավելի մեծ հարված հասցրեց մեր պետությանը, ցույց տվեցին, որ մենք ունենք մեծամասնություն, որն անպատասխանատու է պարզապես: Այսինքն` շատ հստակ է, որ պարտավոր են գալ նիստերի, չեն գալիս: Ավելի անպատասխանատու կեցվածք իշխանությունների կողմից դժվար է պատկերացնել»,-եզրակացրեց Ա. Ռուստամյանը:

Խորհրդարանական ընդդիմությունն առայժմ միասնական որոշում չունի, սակայն համատեղ քննարկումներից հետո խմբակցությունները կփորձեն գալ հետագա քայլերի վերաբերյալ միասնական եզրակացության:

Այս ամենին բավականին հանգիստ է վերաբերվում ՀՀԿ-ն: Ըստ խմբակցության ղեկավար Գալուստ Սահակյանի, խորհրդարանական փոքրամասնության քննադատությունն «արհեստածին է»: «Փաստինֆո»-ի թղթակցի հարցին, թե արդյոք ՀՀԿ-ն տեսնու՞մ է ԸՕ-ի բարեփոխումների անհրաժեշտություն, Գ. Սահակյանն ասաց. «Այսպես թե այնպես` ցանկացած համապետական ընտրությունից առաջ Ընտրական օրենսգիրքը նորից մեկ անգամ նայվում է: Ամիսներ առաջ ԸՕ-ն քննարկվել է, և փորձել ենք նաև մասնակից դարձնել ՀԱԿ-ին, սակայն այն ժամանակ «շատ դաժան էին». ոչ մի առնչություն, մենք ենք մոնոպոլ կարգավիճակում, որևէ այլ ընդդիմություն չկա: Այսօր իրենք սնանկ կեցվածքով փորձում են բաղադրիչներ որոնել, որպեսզի վերակենդանացման պրոցես ապրեն, որին մենք չենք ուզում մասնակցել»:

Ինչ վերաբերում է առաջարկվող կոնկրետ օրենսդրական փոփոխություններին, ապա հանրապետականները, ինչպես վստահեցրեց Գ. Սահակյանը, իհարկե, նախագիծը նայել են, հատկապես որ այն «կառավարության կողմից հանգամանորեն վերլուծված է, ինչը համընկնում է նաև ՀՀԿ-ի կարծիքի հետ»: ՀՀԿ խմբակցության ղեկավարի համոզմամբ, կարելի է քննարկել, ընդունել կամ չընդունել, բայց առաջիկայում նախագահական ընտրություններ են: «Այսօր խաղի կանոններ փոխելն անտրամաբանական է, և անպիտանի մի աշխատանք է դառնում քննարկումը»,-ընդգծեց Գ. Սահակյանը: