Փաստ ինֆո

«Թրաֆիքինգի գործերի դեպքում դատավճիռները միշտ բխում են տուժողի շահերից: Շատ քիչ հանցագործությունների մասով կարող ենք նման բան ասել, դրանցից մեկը հենց թրաֆիքինգն է»: «Pastinfo.am»-ի թղթակցի հետ զրույցում նշեց «People in need» հայաստանյան կազմակերպության թրաֆիքինգի և միգրացիոն ծրագրերի ղեկավար Տաթևիկ Բեժանյանը:

ՅՈՒՆԵՍԿՕ-ն նոյեմբերի 20-ը նշում է որպես երեխաների միջազգային օրը:

Ըստ Տ. Բեժանյանի` 2008-2012 թթ. Հայաստանում բացահայտվել է մանկական թրաֆիքինգի 8 դեպք, որոնց հետևանքով տուժել է 11 երեխա: Նրանցից 4-ի գործերի դեպքում դատավճիռ է կայացվել, երեքը գտնվում են քննության ընթացքում:

11 տուժողներից 6-ը աղջիկներ են, 5-ը՝ տղաներ: Աղջիկներից 4-ը ենթարկվել է սեռական բռնության, մյուս 2-ը՝ մուրացկանության:

«Հայաստանում թրաֆիքինգի 11զոհ ունենալը վատ է, մեկն էլ է վատ»,- նշեց Տ. Բեժանյանը` ընդգծելով, որ վերոնշյալ 11 դեպքերից որևէ մեկը ծնողի դիմումի հիման վրա չի բացահայտվել, դրանք բոլորը բացահայտվել են հկ-ների կամ ոստիկանության կողմից:

Նրա խոսքով՝ 11 դեպքերը միայն բացահայտվածներն են, թաքնված դեպքեր բնականաբար ևս շատ կան, սակայն դրանց մասին բարձրաձայնող չկա:

«Հասարակության ներսում կարծիք փոխելու խնդիր ունենք, մարդիկ հաճախ վախենում են պիտակավորվելուց և իրենց երեխայի հետ կապված դեպքը չեն բարձրաձայնում: Մեր ամբողջ խնդիրը մեր հասարակության ներսում է: Մեր խնդիրների մասին խոսել չենք սիրում, թաքցնում ենք»,- նշեց Բեժանյանը:

Ըստ նրա` թրաֆիքինգի այն գործերը, որոնք հասել են նախաքննական մարմին և որոնց մասով տեղի է ունեցել դատաքննություն, շատ մանրազնին ուսումնասիրվել են, պատժաչափերն էլ բավականին համաչափ են եղել:

«Վերլուծելով դատական գործընթացները` կարող եմ ասել, որ գոհ եմ: Դեռ չի եղել դեպք, որ ապացուցված գործը դատարանում «փլվի»»,- նշեց Տ. Բեժանյանը` միաժամանակ հավելելով, որ ինքն էլ չգիտի, թե որն է դատարանների` թրաֆիքինգի գործերին այդքան հատուկ ուշադրություն դարձնելու պատճառը: Բեժանյանի խոսքով՝ դատարանների առումով խնդիր չունենք, խնդիրն առկա է գործը մինչև դատարան հասնելը: