Փաստ ինֆո

«Ոլորտում առկա խնդիրները բազմաշերտ են: Դրանք իրենց արմատներով հասնում են խորհրդային կարգերի հաստատման առաջին տարիները: Իրենց վրա կրում են խորհրդային բանտային համակարգի գրեթե բոլոր բացասական երևույթները, մատնանշում են արևմտյան բանտային համակարգերի որոշ բացասական տարրեր»,- քրեակատարողական հիմնարկներում և ոստիկանության ձերբակալված անձանց պահելու վայրերում մարդու իրավունքների վիճակի վերաբերյալ նոյեմբերի 20-ի ընդլայնված խորհրդարանական լսումների ժամանակ հայտնեց ՀՀ արդարադատության նախարար Հրայր Թովմասյանը:

Ըստ նախարարի, այդ խնդիրներից կարելի է առանձնացնել գերծանրաբեռնվածությունը, շենքային վատ պայմանները, սոցիալ-հոգեբանական ու բուժսպասարկման ծառայության բացակայությունը, զբաղվածության ցածր աստիճանը, պրոբացիոն ծառայության բացակայությունը, այլընտրանքային պատիժների կիրառման ցածր աստիճանը, որակյալ կադրերի պակասը և պատիժ կրող անձի նկատմամբ վերաբերմունքի փոփոխությունը:

Հ. Թովմասյանը հավելեց, որ այս մասին ինքն ասել է 2011թ. հունվարին` ՀՀ արդարադատության նախարարի պաշտոնը ստանձնելուց հետո մեկ կամ մեկուկես ամիս անց: Դեռևս այն ժամանակ նորանշանակ նախարարն ընդգծել է, որ, ի տարբերություն նոտարիատի և քաղաքացիական կացության ակտերի գրանցման ծառայության, քրեակատարողական ծառայության ոլորտում արագ բարեփոխումները մեծ ռիսկայնություն են պարունակում` «կապված այն կոնտիգենտի հետ, ում վերաբերում են այդ բարեփոխումները», այն է` ազատազրկման դատապարտվածների հետ: «Աշխարհի որևէ երկիր բանտային համակարգում հեղափոխական փոփոխություններ չի կատարել»,-ասաց նախարարը` հավելելով, որ «քայլ առ քայլ և համաչափ» հնարավոր է այս ոլորտում որոշակի փոփոխությունների հասնել:

Արդարադատության նախարարը խնդրեց ազատազրկման վայրերում գտնվող անձանց մասին խոսելիս «մի քիչ զգույշ լինել», հաշվի առնելով, որ «մյուս կողմում որբ մնացած երեխաներ են, բռնաբարված անչափահաս աղջիկներ ու տղաներ», այլ տուժածներ: Անձամբ նախարարի համար թեև հասկանալի են դատապարտյալների գործողություններից տուժածների զգացմունքները, այդուհանդերձ ինքը հակված է «անազատության մեջ գտնվող յուրաքանչյուր մարդու մեջ տեսնելու այն մարդուն, որը կարող է լիարժեք կյանք վերադառնալ, դառնալ լավ ամուսին, հայր, ինչու չէ` նաև մեր սահմանների պաշտպան»:

«Ես պատրաստ եմ որպես արդարադատության նախարար քննադատություն լսել ոլորտում առկա խնդիրների մասին, որոնց մի մասը կամ մեծ մասը, կամ առավելագույն մասը պայմանավորված է համապատասխան նյութական միջոցների բացակայությամբ, բայց ես պատրաստ չեմ լինել այն կառավարության անդամը, որը պաշտպանության նախարարության ոչ պատշաճ ֆինանսավորման պատճառով թեկուզ և մեկ քառակուսի հող է կորցրել»,-հայտարարեց Հ. Թովմասյանը` հավելելով, որ առաջնահերթությունները որոշելիս ելնում են հենց այս սկզբունքից: