Փաստ ինֆո

ԱՄՆ և Հայաստանի քաղաքացի որսորդ Ալֆրեդ Հարությունյանին մեղադրանք է առաջադրվել ՀՀ քրեական օրենսգրքի 215-րդ հոդված 2-րդ մասով (մաքսանենգություն):

Ալֆրեդ Հարությունյանը 2011թ. սեպտեմբերին Հայաստան է եկել մշտական բնակություն հաստատելու նպատակով՝ իր հետ բերելով 3 որսորդական հրացան և 40 միավոր փամփուշտ: Սակայն օդանավակայանում անվտանգության աշխատակիցները պահանջել են, որ նա զենքերը հանձնի մաքսային ծառայությանը, և ոստիկանությունից համապատասխան փաստաթուղթ ներկայացնելու դեպքում նոր միայն իրեն կվերադարձվեն զենքերը: Վերջինս դիմում է ոստիկանություն և համապատասխան փաստաթղթերի առկայությամբ նրան են վերադարձվում զենքերը:

«3 ամիս հետո՝ իմ բոլոր անձնական իրերը և մեքենաները Հայաստան տեղափոխելու ժամանակ, մաքսային ծառայության աշխատակիցները արկղերից մեկում հայտնաբերել են իմ զինամթերքի փամփուշտները, ինչպես նաև հայրենիքում եղած նախորդ այցելությունների ժամանակ ձեռք բերած դանակները»,- այսօր լրագրողների հետ հանդիպման ժամանակ պատմեց Ալֆրեդ Հարությունյանը:

Ալֆրեդ Հարությունյանի խոսքով՝ մաքսայինի աշխատակիցները նույնիսկ ծաղրել են որոշ իրերի համար, ինչը շատ վիրավորել է իրեն: Վերջինս նշում է նաև, որ իրեն ոչ ոք չի ասել, որ պետք է հայտարարագրեր այդ փամփուշտները:

«5-6 ամիս քաշքշուկից հետո, իրերս վերադարձրել են, բացառությամբ դանակների, փամփուշտների, հրացանի փայտյա խզակոթի»,- նշում է Ալֆրեդ Հարությունյանը, հավելելով, որ հունիսի 20-ին տեղի է ունեցել առաջին դատական նիստը:

Ալֆրեդ Հարությունյանի փաստաբան Ռուզաննա Սիրեկանյանը քրեական գործի վարույթը հանցակազմի բացակայությամբ կարճելու և Ալֆրեդ Հարությունյանի նկատմամբ քրեական հետապնդումը դադարեցնելու միջնորդություն է ներկայացրել դատարան:

Հաջորդ դատական նիստը տեղի կունենա նոյեմբերի 23-ին: