Փաստ ինֆո

Սահմանադրական դատարանն ընդունել է, որ մարդու իրավունքները խախտվում են, քանի որ  անձը վարչական պատասխանատվության է ենթարկվում առանց որևէ վարույթի, առանց դրա դեմ դատական պաշտպանության հնարավորության: «Pastinfo.am»-ի թղթակցի հետ զրույցում նշեց փաստաբան Կարեն Մեժլումյանը:

Հիշեցնենք, որ Կարեն Մեժլումյանի դիմումի հիման վրա Սահմանադրական դատարանը նոյեմբերի 13-ին գրավոր ընթացակարգով քննության էր առել ՀՀ վարչական իրավախախտումների վերաբերյալ օրենսգրքի 305-րդ հոդվածի 3-րդ և 4-րդ մասերի` Սահմանադրությանը համապատասխանության հարցը որոշելու վերաբերյալ գործը:

Կարեն Մեժլումյանի կողմից վիճարկվող դրույթները վերաբերում էին տուգանք նշանակելու մասին որոշումը կատարելու ժամկետներին ու կարգին: Համաձայն վերոնշյալ դրույթների` եթե վարորդը նշանակված տուգանքը 30 օրվա ընթացքում չի վճարում` դրա չափը 30 օրից հետո եռապատկվում է, իսկ 60 օրվա ընթացքում չվճարելիս՝ հնգապատկվում: Դարձյալ չվճարելու դեպքում 120 օրվա ընթացքում հնգապատկված տուգանքի չափը բռնագանձելու համար ճանապարհային ոստիկանությունը դիմում է վարչական դատարան:  

Սահմանադրական դատարանը որոշել էր, որ ՎԻՎ օրենսգրքի 305-րդ հոդվածի 3-րդ և 4-րդ մասերի դրույթները համապատասխանում են ՀՀ Սահմանադրությանը:

Կ. Մեժլումյանի խոսքով՝ միևնույն ժամանակ ՍԴ-ն իր որոշման մեջ նշել էր, որ օրենսդրական բաց կա. «Բայց այդ բացը ոչ թե «Վարչական իրավախախտումների վերաբերյալ» օրենսգրքով պետք է լուծվի, այլ «Վարչարարության հիմունքների ու վարչական վարույթի մասին» և «Վարչական դատավարության մասին» օրենսգրքով: Այսինքն՝ օրենսդրական բաց կա, դրանով մարդու իրավունքները խախտվում են»,- նշեց Կ. Մեժլումյանը: Ըստ նրա` ՍԴ որոշումն ազդակ է ԱԺ-ի համար, որպեսզի օրենսդրական բացը լրացվի:

Տես նաև՝

• ՎԻՎ օրենսգրքի դրույթները համապատասխանում են Սահամանդրությանը