Փաստ ինֆո

ՌԴ Օռլով քաղաքի Հյուսիսային շրջանային դատարանը առանձնապես մեծ չափերով խարդախության մեջ մեղավոր է ճանաչել նույն քաղաքի պետական համալսարանի հոգեբանության և մանկավարժության ամբիոնի նախկին ավագ դասախոս Իրինա Դիրդովային: Պարզվում է, որ տիկինն իր հանցակից ընկերուհու՝ Սվետլանա Ս.-ի հետ լուրեր է տարածել, որ շուտով Օռլովում պետք է բացվի Մոսկվայի միլիցիայի պետական քոլեջի մասնաճյուղ: Դիրդովան ամենուր ասել և հաստատել է, որ ինքը հանդիսանում է այդ քոլեջի տնօրենը և ունի ոստիկանության մայորի աստիճան: Նա խոստացել է աշխատանքի ընդունել նրանց, ովքեր «քոլեջի զարգացման համար» կմուծեն 10-25 հազար ռուբլի: Գումարները վճարողների հետ նա անցկացրել է հարցազրույց, որից հետո նրանց վերաբերյալ «ընդունել է աշխատանքի տեղավորման մասին դրական որոշում»: Աշխատանքի ընդունվելու թեկնածուներին լուսանկարել են «վկայականի» համար և այդ ծառայության դիմաց նույնպես գանձել որոշ գումար:

«Կոլեկտիվի ձևավորման համար նախապատվությունը տրվել է նախկին և դեռ գործող ՆԳ, արտակարգ իրավիճակների և դաշնային անվտանգության աշխատակիցներին և Օռլովի բարձրագույն ուսումնական հաստատությունների մանկավարժներին: Հատկանշական է, որ խարդախ տիկնայք իրենց ապագա «աշխատակիցներին» խոստացել են վճարել 45 հազար ռուբլուն մոտ աշխատավարձ, լրիվ սոցփաթեթ և հատուկ ոստիկանական կոչումներ:

Դիրդովան փող է վերցրել նաև դիմորդներից: Դա էլ՝ իբր հետագայում քոլեջում ուսումը շարունակելու համար, միաժամանակյա ներդրում: Ընդհանուր առմամբ կինը 77 տուժողներից շորթել է 1մլն 270 հազար ռուբլի:

Դատարանը Իրինա Դիրդովային դատապարտեց 4 տարվա ազատազրկման ընդհանուր ռեժիմի գաղութում, տուգանեց 1 մլն ռուբլով և 1 տարի 6 ամսով սահմանափակեց նրա ազատությունը:

Բացի այդ բավարարեցին նրանից վնասի փոխհատուցում ստանալու տուժողների հայցերը: