Փաստ ինֆո

Դժվարին պայմաններում հայտնված ՄԻԱՎ-ով ապրող 5-ամյա երեխայի վերաբերյալ ՄԻՊ գրասենյակի տարածած հաղորդագրությունն արձագանք է գտել: Մասնավորապես որոշ անհատներ ու միջազգային կազմակերպություններ իրենց աջակցությունն են ցույց տվել սննդի, հագուստի և գումարի տեսքով:

Այդ մասին «Pastinfo.am»-ի թղթակցի հետ զրույցում նշեց ՀՀ մարդու իրավունքների պաշտպանի մամուլի քարտուղար Նաիրա Կարմիրշալյանը:

Հիշեցնենք, որ հոկտեմբերի 31-ին ՄԻՊ գրասենյակը հայտարարություն էր տարածել ՄԻԱՎ-ով ապրող հնգամյա երեխայի մասին` տեղեկացնելով, որ երեխան, ՄԻԱՎ-ից բացի ունի նաև մի շարք այլ հիվանդություններ` մտավոր հետամնացություն, մանկական ուղեղային կաթված և մաշկային հիվանդություն: Չունենալով ապրուստի նվազագույն միջոցներ՝ երեխայի մայրը գումար է վաստակում մուրացկանությամբ՝ ներքաշելով երեխային նման կենսակերպի մեջ։

«Երեխայի մայրը խոստացել է, որ մուրացկանությամբ այլևս չի զբաղվելու, երեխային ևս չի ներքաշելու դրա մեջ: Երեխան չի կարողանում նույնիսկ խոսել»,- նշեց Ն. Կարմիրշալյանը: Ըստ նրա` երեխան և մայրն ապրում են ծայրահեղ ծանր պայմաններում: Այժմ ՄԻՊ գրասենյակը փորձում է հասարակական կազմակերպություն գտնել, որի միջոցով կկարողանա երեխային և նրա մորը փոխանցել ձեռք բերված հագուստը, սնունդը, գումարը: ՄԻՊ գրասենյակը նաև հայտարարել էր, որ անհաջողությամբ են ավարտվում երեխային ցերեկային խնամքի կենտրոնով ապահովելու փորձերը: 18 կառույցներ՝ պետական մարմիններ և հասարակական կազմակերպությունների տարբեր պատճառներով մերժել էին երեխային ընդունել իրենց հաստատություն: Ն. Կարմիրշալյանի խոսքով` ցերեկային խնամքի խնդիրն այժմ էլ շարունակում է մնալ չլուծված: «Առաջիկա օրերին երևի այդ հարցն էլ կլուծվի, կկարողանանք երեխային ապահովել ցերեկային խնամքով: Բոլորովին այլ տեղերից համաձայնեցին երեխային ընդունել իրենց կենտրոն»,- նշեց ՄԻՊ մամուլի քարտուղարը` չցանկանալով հստակեցնել, թե որ կենտրոնի մասին է խոսքը: «Չեմ ուզում հստակ ասել, թե ով է համաձայնել, քանի որ Դեռ բանակցությունների փուլում ենք: Առաջիկա օրերին կհայտարարենք, թե որ կազմակերպության միջոցով ենք ցերեկային խնամք ապահովելու, ինչպես նաև կներկայացնենք, թե ովքեր են օգնություն ցույց տվել` գումարի և հագուստի տեսքով»,- նշեց Ն. Կարմիրշալյանը:

Տես նաև՝

ՄԻՊ.ՄԻԱՎ-ով հիվանդ երեխայի մայրը գումար է վաստակում մուրացկանությամբ