Փաստ ինֆո

Շուրջ մեկ տարի առաջ «Սիլ Կոնցեռն» ՍՊԸ-ն դիմել էր ՀՀ վարչական դատարան ՀՀ էկոնոմիկայի նախարարության մտավոր սեփականության գործակալության կողմից ապրանքային նշանի գրանցումը մերժելու մասին որոշումները վերացնելու և «Սիլ Կոնցեռն»-ի ներկայացրած ապրանքանիշը գրանցելու համար բարենպաստ վարչական ակտեր ընդունելուն պարտավորեցնելու պահանջով:

Բանն այն է, որ 2011 թ. հոկտեմբերին ընկերությունը դիմել է գործակալությանն իր կողմից ներկայացված նշանները որպես ապրանքային նշան գրանցելու համար, սակայն Էկոնոմիկայի նախարարությունում «Սիլ Կոնցեռն»-ի դիմումը մերժել են, պատճառաբանելով, թե ներկայացված ապրանքային նշանը շփոթելու աստիճան նման է «Արարատ գրուպ» ՍՊԸ-ի կողմից ավելի վաղ գրանցած ապրանքանիշին և կարող է հանրության մոտ շփոթություն առաջացնել:

Հարցին իրավական գնահատական տալու և որոշումը բողոքարկելու նպատակով «Սիլ Կոնցեռն» ՍՊԸ-ն դիմել է ՀՀ վարչական դատարան:

Ըստ դատարանի վճռից՝ Գործակալության այն համոզմունքը, որ հայցվորի կողմից հայտարկվող ապրանքային նշանները և «Արարատ գրուպ» ՍՊԸ անվամբ ավելի վաղ գրանցված ապրանքային նշանները միմյանց շփոթության աստիճան նման են, անհիմն է, հետևաբար 11.10.2011թ. Գործակալության կողմից կայացված «Ապրանքային նշանի գրանցումը մերժելու մասին» որոշումները «Վարչարարության հիմունքների և վարչական վարույթի մասին» ՀՀ օրենքի 63-րդ հոդվածի 1-ին մասի «ա» (օրենքի խախտմամբ, այդ թվում` օրենքի սխալ կիրառման կամ սխալ մեկնաբանման հետևանքով)  և «բ» (կեղծ փաստաթղթերի կամ տեղեկությունների հիման վրա, կամ եթե ներկայացված փաստաթղթերից ակնհայտ է, որ ըստ էության պետք է ընդունվեր այլ որոշում) ենթակետերի հիմքով, որպես ոչ իրավաչափ վարչական ակտեր, ենթակա են անվավեր ճանաչման, քանի որ դրանք կայացվել են իրավական ակտերի սխալ կիրառման և սխալ մեկնաբանման արդյունքում, բացի այդ էլ ակնհայտ է, որ ըստ էության գործակալությունը պետք է ընդուներ այլ որոշում` գրանցելով թիվ 20110673 և 20110674 հայտերով ներկայացված ապրանքային նշանները։
Այսպիսով, Դատարանը գտավ, որ հայցը հիմնավոր է և ենթակա է բավարարման։

«Սիլ կոնցեռն»-ի խախտված իրավունքները վերականգնելու համար անվավեր են ճանաչվել Էկոնոմիկայի նախարարության մտավոր սեփականության գործակալության որոշումները և վերջինիս պարտավորեցվել է ընդունել բարենպաստ վարչական ակտեր ներկայացված ապրանքային նշանները գրանցելու համար:

Էկոնոմիկայի նախարարության մտավոր սեփականության գործակալությունն ու «Արարատ գրուպ»-ը Վարչական դատարանի որոշումը բողոքարկել են Վերաքննիչ վարչական դատարան:

Վերջինս Վարչական դատարանի որոշումը 2012 թ. նոյեմբերի 14-ին կայացած նիստի ժամանակ թողել է նույնը:

«Եթե մեկ ամսվա ընթացքում որոշումը չբողոքարկվի Վճռաբեկ դատարան, այն կմտնի օրինական ուժի մեջ, և ընկերությունը հնարավորություն կունենա կատարել հաջորդ քայլը»,- տեղեկացրեց «Սիլ Կոնցեռն» ՍՊԸ-ի ներկայացուցիչ Դիաննա Գրիգորյանը:

ի դեպ, «Pastinfo.am»-ի հավաստի տեղեկություններով՝ պատասխանող կողմը մտադիր է դիմել վճռաբեկ դատարան: