Փաստ ինֆո

ՀՀ կառավարությանն առընթեր ոստիկանության քննչական գլխավոր վարչության ՀԿԳ քննության վարչությունում ավարտվել է Ալավերդի քաղաքի բնակիչ Գ. Կլինկարովի սպանության դեպքի առթիվ հարուցված քրեական գործի նախաքննությունը: Քրեական գործով դատավարական ղեկավարում իրականացնող դատախազը հաստատել է մեղադրական եզրակացությունը: Այդ մասին «Pastinfo.am»-ին տեղեկացրեցին ՀՀ գլխավոր դատախազությունից:

Նախաքննությամբ ձեռք բերված փաստական տվյալների համաձայն` Լոռու մարզի Ալավերդի քաղաքի բնակիչներ Գ. Կիլինկարովի և Աշոտ Շաքարյանի միջև դեռևս 2000 թվականից ձևավորվել են թշնամական հարաբերություններ, որի պատճառը եղել է Աշոտ Շաքարյանի կողմից Գ. Կիլինկարովի վրա կրակելը և Գ. Կիլինկարովի եղբոր` Ա. Կիլինկարովի կողմից Աշոտ Շաքարյանի եղբորը` Արսեն Շաքարյանին սպանելը:

Արդյունքում` Գ. Կիլինկարովը, իմանալով, որ Վ. Շահվերդյանը Ա. Շաքարյանի սանիկն է, տարբեր ժամանակահատվածներում սպառնացել է վերջինիս, որն էլ պատճառ է հանդիսացել, որպեսզի Վ. Շահվերդյանը վրեժխնդիր լինի Գ.Կիլինկարովից:

Այդ նպատակով Վ. Շահվերդյանը դեռևս 2011թ. ապրիլին ապօրինի կերպով ձեռք է բերել ինքնաշեն եղանակով ակոսավոր փող տեղադրելու միջոցով մարտականի վերափոխված, ակոսափող հրազեն հանդիսացող 9մմ տրամաչափի «ԻԺ-79-8» մոդելի գազային ատրճանակ և 2012թ. հունվարի 12-ին` ժամը 13:40-ի սահմաններում, Ալավերդի քաղաքի կենտրոնական հատվածում հիշյալ ատրճանակից 7 անգամ կրակել է Գ. Կիլինկարովի վրա:

Գ. Կիլինկարովը ստացած 6 հրազենային վնասվածքներից տեղում մահացել է: Իսկ վերջինիս հետ գտնվող Ա. Կոստանդյանն ստացել է միջին ծանրության հրազենային վնասվածք:
Այնուհետև Վ. Շահվերդյանն ինքնակամ ներկայացել է ՀՀ ոստիկանության Թումանյանի բաժին, հայտնել կատարվածի մասին և ներկայացրել հանցագործության գործիք հանդիսացող ատրճանակը:

Ձեռք բերված ապացույցների հիման վրա Վ. Շահվերդյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 6-րդ կետով, 235-րդ հոդվածի 1-ին մասով և 121-րդ հոդվածի 1-ին մասով: Քրեական գործն ուղարկվել է Լոռու մարզի ընդհանուր իրավասության առաջին ատյանի դատարան: