Փաստ ինֆո

Նոյեմբերի 21-ին՝ ժամը 12:00-ին կհավիրվի ՀՀ Ազգային ժողովի արտահերթ նիստ: Օրակարգում ընդգրկված է ՀՀ ընտրական և քրեական օրենսգրքերում, «Բնակչության պետական ռեգիստրի մասին» օրենքում փոփոխություններ և լրացումներ կատարելու մասին օրենքների նախագծերի փաթեթը:

Արտահերթ նիստ հրավիրելու նախաձեռնությունը օրենսդրական փաթեթի հեղինակների` «Հայ ազգային կոնգրես» խմբակցության անդամներինն է: Նախաձեռնությանը իրենց ստորագրություններով միացել են «Բարգավաճ Հայաստան», ՀՅԴ և «Ժառանգություն» խմբակցությունների անդամները:

ԱԺ կանոնակարգ-օրենքի համաձայն, արտահերթ նիստ գումարում է Ազգային ժողովի նախագահը` Հանրապետության Նախագահի, պատգամավորների ընդհանուր թվի առնվազն մեկ երրորդի` 44-ի, կամ Կառավարության նախաձեռնությամբ: Այն ներառում է արտահերթի օրակարգը, անցկացման ժամկետը և օրակարգային հարցերի նախագծերը:
Ի դեպ` ԱԺ նիստն իրավազոր է, եթե քվորումն ապահովված է, այսինքն` սահմանված կարգով գրանցվել է պատգամավորների ընդհանուր թվի կեսից ավելին` առնվազն 66 պատգամավոր: Եթե նիստն իրավազոր չէ, ապա գրանցումը շարունակվում է մինչև քվորում ապահովելը, բայց ոչ ավելի, քան 3 ժամ: Այդ ժամկետում քվորումի չապահովման դեպքում տվյալ օրվա նիստերը համարվում են չկայացած:

Քաղաքական մեծամասնության ներկայացուցիչներն երեկվանից հայտարարում են, որ հավանական չեմ համարում քվորումի ապահովումը, քանի որ կոալիցիոն ուժերը ԱԺ լիագումար նիստերի օրակարգում այդ հարցի ընդգրկմանը դեմ են քվեարկել։ ՀՀԿ խմբակցության ղեկավար Գալուստ Սահակյանն էլ այսօրվա ճեպազրույցում հայտնել է, որ Հանրապետական կուսակցությունը «անիմաստության դաշտից հեռու է մնալու»: Նրա պարզաբանմամբ, ընդդիմությունը պարզապես փորձում է նախագահական ընտրություններից առաջ ակտիվանալ, մինչդեռ ՀՀԿ-ն ակտիվանալու խնդիր չունի:

Նշենք, որ նախաձեռնության տակ ստորագրած խորհրդարանական 4 ուժերն ունեն 53 պատգամավոր, ևս 2 պատգամավորներ անկախ են, այսինքն` որևէ խմբակցության կազմում ընդգրկված չեն: Մնացած 74 պատգամավորները ներկայացնում են քաղաքական կոալիցիան` ՀՀԿ-ն և «Օրինաց երկիր»-ը` համապատասխանաբար 68 և 6: