Փաստ ինֆո

Երևանում տեղակայված արագաչափերը սերտիֆիկացված չեն,- շարունակում է պնդել Աքիլլես» ավտովարորդների իրավունքների պաշտպանության կենտրոնը՝ հայտարարելով, որ ոստիկանությունն այդպես էլ պաշտոնապես չի պատասխանում, թե ինչպիսի արագաչափ է օգտագործվում:

Հիշեցնենք, որ Է. Հովհաննիսյանի` արագաչափերի սերտիֆիկացված չլինելու մասին հայտարարությանն օրեր անց արձագանքել էր նաև ոստիկանությունը՝ հերքելով այն։ «Երևանում և միջպետական նշանակության ավտոճանապարհներին տեղադրված արագաչափ սարքերը սերտիֆիկացված են: Ավելին` դրանք սերտիֆիկացված են ոչ միայն Հայաստանի Հանրապետության, այլև Ռուսաստանի Դաշնության և Գերմանիայի Դաշնային Հանրապետության համապատասխան մարմինների կողմից: Մեր ձեռքի տակ են նաև այդ մարմինների կողմից տրված, ուժի մեջ գտնվող սերտիֆիկատների օրինակները»,- նշված էր հայտարարության մեջ:

«Աքիլլես» կազմակերպությունը պարզել էր, որ Հայաստանում տեղադրված արագաչափերն արտադրված են Գերմանիայում՝ Ջենոոփթիք Ռոբոտ ընկերության կողմից, մոդելն է MR S580: Այդ սարքերի անճշտության մակարդակը 3 կմ/ժամ է: Ինչպես «Pastinfo.am»-ի թղթակցի հետ զրույցում նշեց «Աքիլլես» ավտովարորդների իրավունքների պաշտպանության կենտրոնի նախագահ Էդուարդ Հովհաննիսյանը, ճանապարհային ոստիկանությունը պնդում է, թե տեղադրված արագաչափերը ոչ թե MR S580, այլ SD 580 մոդել են, որոնց անճշտության աստիճանը 1 կմ/ժամ է: «Մենք ասում ենք` բայց չէ որ սարքի աջ անկյունում գրված է Оборудование - MR S580, պատասխանում են` սխալ է գրված: Ասում են, թե սարքերը SD 580 մոդելի են, բայց գրավոր չեն պատասխանում, որ Հայաստանում հենց այդ մոդելի սարքերն են տեղադրված: Այդ պատճառով դիմել ենք դատարան»: Ըստ Է. Հովհաննիսյանի` պահանջը հետևյալն է` եթե Հայաստանում տեղադրված սարքերը SD 580 մոդելի են, որոնց անճշտության աստիճանը 1 կմ/ժամ է, ապա վարորդները վարչական պատասխանատվության պետք է ենթարկվեն 2-ով վերջացող թվերի` ասենք 62, 72 և ավելի կմ/ժ արագությամբ ընթանալու դեպքում: