Փաստ ինֆո

Հունիսի 17-ին «Հարսնաքար» ռեստորանային համալիրում բռնարարքի գործով Երևանի Ավան և Նոր Նորք վարչական շրջանների դատարանի՝ դատավոր Դավիթ Հարությունյանի նախագահությամբ, այսօրվա նիստում սկսեց ցուցմունքներ տալ տուժող Գարիկ Սողոմոնյանը: Նրա և ավելի վաղ դատարանում ցուցմունքներ տված Արտակ Բայադյանի ցուցմունքներն ըստ էության նույնն էին:

Ըստ այդմ, տուժող Վահե Ավետյանը զգուշացվել էր դրեսկոդի մասին, այսինքն՝ «մեզ մոտ մարզահագուստով չեն գալիս», ապա ավելի ուշ մատուցող Դավիթ Ադամյանը ագրեսիվ տոնայնությամբ դուրս է կանչել Վահե Ավետյանին: Տուժող Սողոմոնյանը քիչ անց դուրս գալով սրահից, տեսել է առաջին հարվածը ստացած Վահե Ավետյանին:

Ըստ տուժողի, Նորայր Հայրապետյանը նախատել է մատուցողին, իրենց հավաստիացրել, որ մատուցողը կպատժվի և ասել՝ «եկեք քայլենք այնտեղ, կխոսենք» ու ուղեկցել իրենց դեպի ավտոկայանատեղի: Այստեղ «կտրուկ սկսեցին խփել, բոլորով խառը հարվածում էին, ի վիճակի չէի տեսնել ով ում էր հարվածում»: Հարվածողները շատ էին՝ 15-20 հոգի, այդ թվում՝ գործով 6 ամբաստանյալները, բաժանողներ չեն եղել: Ուշաթափվել է, ուշքի գալով՝ տեսել է ուշաթափված Վահե Ավետյանին: Նրան շտապ տեղափոխել են հոսպիտալ, որտեղ վերելակի մեջ Վ.Ավետյանի մոտ շնչառական կանգ է տեղի ունեցել:

Վեցից չորս ամբաստանյալների պաշտպանները միջնորդեցին իրենց տրամադրել կրիչը՝ նիստի ձայնագրառմամբ, դատարանը մերժեց միջնորդությունը՝ տուժողը հարցաքննվել է պաշտպանների ներկայությամբ, և անհրաժեշտություն չկա: Դատարանը միաժամանակ վստահեցրեց, որ կրիչները կտրամադրվեն նիստի ավարտին:

Պաշտպանական կողմի հարցաքննությունն ընդհատվեց ամբաստանյալ Արման Խաչատրյանի վատ ինքնազգացողության՝ գլխապտույտի և սրտխառնոցի, պատճառով: Նախագահող դատավորը հավաստիացրեց, որ անպայման դատարան կհրավիրվի շտապբուժօգնության բրիգադ, և դատական նիստը հետաձգվեց մինչև նոյեմբերի 20-ը:

Տես նաև՝

• Սկսեց ցուցմունքներ տալ «Հարսնաքար»-ի գործով երկրորդ տուժողը
• Մեղադրանքը կպաշտպանեն երկու դատախազներ