Փաստ ինֆո

7 նահանգների բնակիչներ հավաքել են անհրաժեշտ քանակով ստորագրություններ, ԱՄՆ-ի կազմից դուրս գալու համար և հիմա իրավունք ունեն դաշնային իշխանությունից սպասելու իրենց միջնորդության պաշտոնական պատասխանին: Խնդրագիրը զետեղված է Սպիտակ տան համացանցային կայքի «Մենք» բաժնում, որտեղ ցանկացողը կարող է գրել իր սեփական միջնորդագիրը կամ էլ միանալ արդեն այնտեղ եղածներին:

Այս ձևով մինչև այժմ նման «անջատողական» միջնորդագրեր են ներկայացրել 40 նահանգ, սակայն դրանցից միայն 7-ում է հաջողվել հավաքել 25 հազարից ավելի ստորագրություն: Ամենաշատ, ավելի քան 100 հազար, ստորագրություն հավաքել է Տեխաս նահանգը: Այստեղի բնակիչների խնդրագրում նշվում է, որ ԱՄՆ-ի տնտեսական հիմնախնդիրները դաշնային իշխանությունների կողմից բյուջետային քաղաքականությունը բարեփոխելու անկարողության արդյունք են: «Նկատի ունենալով այն հանգամանքը, որ Տեխասն ունի հավասարակշռված բյուջե և հանդիսանում է աշխարհի 15-րդ խոշորագույն տնտեսությունը, ապա նրա դուրս գալը միության կազմից, գործնականում հնարավոր է ի կատար ածել»,- գրված է միջնորդության մեջ: Նահանգի բնակիչները նաև բողոքում են մարդու իրավունքների «աղաղակող խախտումների» համար, որոնց մեջ նշվում է օդանավակայաններում ուղևորների խուզարկությունները տրանսպորտի անվտանգության վարչության աշխատակիցների կողմից:

Այդ նույն կայքում, ի դեպ, կա նաև հակընդդեմ միջնորդություն, որը կոչ է անում նահանգի մայրաքաղաքը անջատել Տեխասից և մնալ ԱՄՆ-ի կազմում:

«ԻՏԱՐ-ՏԱՍՍ»-ի հաղորդմամբ Տեխասի հետ միասին 25 հազար ստորագրությունների շեմը հատել են Լուիզիանան, Ֆլորիդան, Հյուսիսային Կարոլինան, Ալաբաման, Ջորջիան և Թենեսսին: Բոլոր այդ նահանգներում, բացառությամբ Ֆլորիդայի, բնակիչների մեծամասնությունը նախագահական ընտրություններում քվեարկել են Օբամայի հակառակորդի՝ Մ. Ռոմնիի օգտին:

Նշենք, որ այս միջնորդագրերը մեծամասամբ կազմված են մի քանի տողերից: Օրինակ, Թենեսսիի բնակիչների միջնորդագիրն այսպիսին է. «Խնդրում ենք Թենեսսիին խաղաղությամբ տալ իրավունք ԱՄՆ-ի կազմից դուրս գալու համար և ստեղծել սեփական նոր կառավարություն»: Միջնորդությունների հեղինակները հղում են անում անկախության Դեկլարացիային, որտեղ ԱՄՆ-ի հիմնադիրները հայտարարում են, որ «եթե կառավարության որևէ ձև դառնում է կործանարար... ժողովուրդն իրավունք ունի փոխել կամ լուծարել այն և հաստատել նոր կառավարություն»:

Ինչպես նշում են ամերիկացի փորձագետները, հավանականությունը, որ Սպիտակ տունը կվառի «կանաչ լույս» որևէ նահանգի երկրի կազմից դուրս գալու ճանապարհին, գործնականում հավասար է զրոյի:

Վերջին անգամ միության կազմից դուրս են եկել 11 նահանգ, այն էլ հեռավոր 1860 և 1861թթ.-երին, Աբրահամ Լինկոլնին նախագահ ընտրելուց հետո: Սակայն, պետք է նշել, որ դրան հաջորդեցին արյունալի իրադարձություններ. սկսվեց Քաղաքացիական պատերազմը: