Փաստ ինֆո

Արդարադատության համակարգում աշխատանքները և ֆինանսական հոսքերը պայմանավորված չեն միայն բյուջետային ֆինանսավորման մակարդակով. շատ տեղերում օրենսդրական փոփոխությունները շատ ավելի արդյունավետ լուծումներ կարող են տալ, քան միայն ֆինանսավորումը: Այս մասին Ազգային ժողովի նոյեմբերի 14-ի նիստում, 2013թ.-ի պետական բյուջեի նախագծի քննարկման ժամանակ, հայտնեց ՀՀ արդարադատության նախարար Հրայր Թովմասյանը:

Անդրադառնալով քրեակատարողական համակարգին, նախարարը նշեց. «Անշուշտ, եթե վերլուծում ենք ֆինանսավորումը, ապա պետք է ասեմ, որ միջին եվրոպականից այն այնքան էլ ցածր չէ: Մենք այսօրվա դրությամբ պատիժը կրող մեկ անձի վրա մեկ օրվա հաշվարկով մոտավորապես ծախսում ենք 4 հազար դրամին համարժեք գումար: Բայց, երբ նայում ենք կառուցվածքին, ապա տեսնում ենք, որ այստեղ խնդիրներ ունենք, թե այդ գումարների որ մասն է գնում պահպանության, որ մասը` աշխատավարձի և բուն սննդի ու պահպանման ծախսերի վրա: Սրանք խնդիրներ են, որոնք մեկ օրում անհնար է լուծել»: Ըստ նրա, ՔԿՀ-ներն այլ երկրներում շատ ավելի քիչ ծախսատար են, և համապատասխան բյուջեի պարագայում կարելի է այլ ուղղությամբ գումարները ծախսել, «սակայն մեզանում, կարծես թե, չի ստացվում»:

Նախարարը տեղեկացրեց, որ առաջիկա օրերին կառավարություն կներկայացվի պայմանական վաղաժամկետ ազատման հստակ ընթացակարգի մասին որոշման նախագիծ: «ԱԺ-ին կներկայացվեն քրեակատարողական օրենսդրության հստակ փոփոխություններ, որոնք շատ արդյունավետ մեխանիզմներ կառաջարկեն պատժի չկրած մասն ավելի մեղմ պատժի միջոցներով փոխարինելու համար: Արդեն իսկ ավարտական փուլում է պրոբացիոն ծառայության մասին հայեցակարգը և օրենսդրությունը, որը, վստահ եմ, հաջորդ տարի կկիրառվի: Այս պարագայում այսօր պատիժ կրող մոտ 900 անձինք պոտենցիալ հնարավորություն ունեն դուրս գալու ազատազրկման վայրերից և անցնելու պրոբացիոն հսկողության տակ»,-ասաց նա: Ըստ նախարարի, այս դեպքում մեկ անձի վրա մեկ օրվա հաշվարկով կծախսվի 400-410 դրամ` ազատազրկման վայրում պահվող անձի վրա ծախսվող 4 հազար դրամի փոխարեն:

«ՔԿՀ-ում ֆինանսական միջոցներին անդրադառնալիս, պիտի ասեմ, որ փոքրիկ հաջողություններ այս տարի կան: Խոսքը վերաբերում է Աջակցություն դատապարտյալին հիմնադրամի գործունեությանը, որն անցած տարվա այս ժամանակահատվածում ունենալով մոտ 26 մլն դրամի պարտք, այս տարվա 10 ամսվա հաշվարկով ամբողջ այդ պարտքերն է փակել և մոտ 13 մլն դրամ ավել գումար ունի»,-հայտնեց Արդարադատության նախարարը: Հ.Թովմասյանի մատուցմամբ, աշխատանքի մեջ ներգրավված դատապարտվածների թիվը 170-ից հասել է 310-ի, հաջորդ տարի կհասնի 410-ի: Նախորդ տարի վերջիններիս վճարված 5 մլն դրամի փոխարեն այս տարվա 10 ամսում արդեն վճարված է 13 մլն դրամ: Հաջորդ տարի այդ գումարը կհասցվի 20-25 մլն դրամի: «Այս հիմնադրամի միջոցներից աշխատանքներ են կատարվել «Արթիկ», «Կոշ», «Վարդաշեն», «Սևան» ՔԿՀ-ներում, արդյունքները ոչ այնքան շոշափելի, բայց տեսանելի են»,-հայտնեց նա:

Նախարարը նշեց նաև, որ բյուջետային ֆինանսավորումից բացի, դատաիրավական բարեփոխումներին և այս ոլորտի խնդիրների լուծմանն ուղղվում են նաև դոնորների կողմից տրված դրամաշնորհային և արտաբյուջետային այլ միջոցներ: Մասնավորապես, միայն Փաստաբանական պալատի, Հանրային պաշտպանի գրասենյակի և Փաստաբանական դպրոցին հաջորդ տարի ընդհանուր առմամբ հատկացվելու է մոտ 1 մլրդ դրամին համարժեք գումար: Այդ թվում, Եվրոպայի խորհրդից 250 հազար ԱՄՆ դոլարի չափով ստացված գրանտային միջոցների շրջանակներում այս երեք կառույցներին կհատկացվի գույք, տեխնիկա, իսկ պետություն-մասնավոր համագործակցության շրջանակներում մոտ 750 մլն դրամի չափով ամբողջությամբ կվերանորոգվի Փաստաբանական պալատին հատկացվելիք շենքը:

Արտաբյուջետային միջոցների շրջանակներում Քաղաքացիական կացության ակտերի գրանցման ծառայությանը հատկացվելու է մոտ 250 հազար ԱՄՆ դոլարի չափով գումար` բազաները թվայնացնելու նպատակով: Մոտ այդքան էլ հատկացվելու է էլեկտրոնային նոտարիատի համակարգի ներդրմանը: