Փաստ ինֆո

Քիչ առաջ Ազգային ժողովի նիստում մեկնարկեց ՀՀ 2013թ.-ի պետական բյուջեի նախագծի քննարկումը: ՀՀ ֆինանսների նախարար Վաչե Գաբրիելյանը ներկայացրեց մշտական հանձնաժողովների նիստերում քննարկված նախագծի անփոփոխ տարբերակը: Այս պահին նախարարը պատասխանում է պատգամավորների հարցերին:

ՀՀ 2013թ.-ի պետական բյուջեի նախագիծն եկամուտների գծով կազմում է 1 տրիլիոն 31 մլրդ 600 մլն դրամ, ծախսերի գծով` 1 տրիլիոն 151 մլրդ 400 մլն դրամ, դեֆիցիտը (պակասուրդը)` շուրջ 119 մլրդ 800 մլն դրամ:

Եկամուտները 2012 թ.-ի համար պետական բյուջեի հաստատված մակարդակի համեմատ ավելացել են շուրջ 120 մլրդ դրամով, ծախսերը` շուրջ 107,2 մլրդ դրամով:

Սոցիալական բնագավառի ծախսերի (կրթություն, առողջապահություն, սոցիալական պաշտպանություն) տեսակարար կշիռը բյուջետային ծախսերի ամբողջ ծավալում կազմում է շուրջ 42 %, պաշտպանության, հասարակական կարգի պահպանության և ազգային անվտանգության ապահովման ոլորտներինը՝ 21%, տնտեսության ճյուղերինը՝ 14 %, պետական պարտքի սպասարկմանը՝ 4,5 %, համայնքների բյուջեներին ՀՀ պետական բյուջեից ֆինանսական համահարթեցման դոտացիաների տրամադրմանը՝ 3,1 %:

Ընդհանուր եկամուտների շուրջ 992,9 մլրդ դրամը նախատեսվում է ստանալ հարկային եկամուտներից և պետական տուրքերից, 16,4 մլրդ դրամը` պաշտոնական դրամաշնորհներից, 22,3 մլրդ դրամը` այլ եկամուտներից:

Դեֆիցիտի ֆինանսավորմանը ներքին աղբյուրներից նախատեսվում է ուղղել շուրջ 55,155 մլրդ դրամ, արտաքին աղբյուրներից` շուրջ 64,634 մլրդ դրամ:

ՀՆԱ իրական աճը կանխատեսվում է 6,2 %, անվանական ՀՆԱ-ն` 4 տրիլիոն 537,3 մլրդ դրամ, միջին գնաճը` 4,2 %: