Փաստ ինֆո

Զավեն Հովսեփյանի կինը զույգ երեխա էր սպասում, հղիության չորրորդ ամսում երեխաներից մեկը մահանում է, սակայն «Արմենիա» հանրապետական բժշկական կենտրոնում հրաժարվում են հեռացնել պտուղը` պնդելով, որ մյուսը լրիվ առողջ է և անհրաժեշտություն չկա հեռացնելու: Մինչդեռ Զավենը մտավախություն ուներ, որ մյուս երեխան հնարավոր է ծնվելուց հետո առողջական խնդիրներ ունենա:

Ծնվելուց հետո 3 ամսեկանում երեխայի սիրտը վիրահատում են, իսկ 8 ամսեկանում`գլխի վիրահատություն է տանում: Այդ ամիսների ընթացքում վիրահատել են նաև Զավեն Հովսեփյանի կնոջը:

Զավեն Հովսեփյանը պահանջում է, որ իր կնոջ հղիության ընթացքի համար պատասխանատու բոլոր բժիշկները ստանան իրենց արժանի պատիժը: Վերջինս այդ պահանջով դիմել է Առողջապահության նախարարություն, սակայն ապարդյուն:

Հոկտեմբերին Զավեն Հովսեփյանը դիմել է Մարդու իրավունքների պաշտպանին և դիմումի մեջ ներկայացրել պատմությունը: Մատնանշել, որ կինը հղիության վերջին չորս ամիսների ընթացքում չորս անգամ դոպլեր հետազոտություն է անցել, սակայն բժիշկներն այդպես էլ ոչ մի կասկածելի բան չեն հայտնաբերել երեխայի մոտ:

Չորս անչափահաս երեխա ունեցող Զավենի ընտանիքն ապրում է վարձով, սոցիալապես ծանր պայմաններում:

«Հիվանդանոցային և բուժման ծախսերը հոգալու համար այլևս պարտք անելու տեղ չի մնացել», իր դիմումի մեջ նշել է Զավեն Հովսեփյանը:

Ինչպես տեղեկացնում են ՄԻՊ-ի գրասենյակից, Պաշտպանը Զավեն Հովսեփյանի խնդրի կապակցությամբ գրություն է ուղարկել Առողջապահության նախարարություն, որտեղից ի պատասխան հայտնել են, որ Զավեն Հովսեփյանի կնոջ բուժօգնության տրամադրման գործընթացն ուսումնասիրելու համար հոկտեմբերի 30-ին ստեղծվել է հանձնաժողով, իսկ հանձնաժողովի ուսումնասիրության արդյունքների մասին լրացուցիչ կտեղեկացնեն Պաշտպանին:

Սակայն անցյալ շաբաթ Զավենը կրկին գնացել է Պաշտպանի գրասենյակ և հայտնել, որ երեխայի վիճակը կրկին վատացել է, և նրան տեղափոխել են հիվանդանոց: