Փաստ ինֆո

Ժամանակ առ ժամանակ հանրությանը ցնցող տեղեկություններ տրամադրելը դարձել է պետական որոշ պաշտոնյաների աշխատաոճը: Առաջին հայացքից տպավորությունն այնպիսին է, որ այս կամ այն ոլորտի առանձին պատասխանատուներ իրենց անմնացորդ նվիրել են երկրում առկա խնդիրները բացահայտելու «սուրբ» գործին, բայց արի ու տես, որ այսօրինակ հատվածային մոտեցումն ընդամենը հիվանդի վերքը թեթևակի մշակելու նման մի բան է ստացվում:

Վերջերս նոր աղմկահարույց բացահայտումների թիրախում պանիրն ու պանիր արտադրող փոքր ու միջին ձեռներեցությամբ զբաղվող կազմակերպություններն էին: Վարչապետի հանձնարարությամբ սննդամթերքի անվտանգության պետական ծառայությունը պանրի ոլորտում ուսումնասիրություններ էր կատարել և պարզել, որ պանիր արտադրող 59 տնտեսվարող սուբյեկտներից 18-ի արտադրանքը չի համապատասխանում պահանջվող չափանիշներին: Որոշում էր կայացվել դադարեցնել նրանց գործունեությունը:

Առաջին հայացքից թվում է՝ ամեն ինչ կարգին է, կան բացահայտումներ, կան տուգանվածներ, որոնք մինչև վերջին մաշիկը ստիպված են վաճառել ու վճարել տույժեր, տուգանքներ, որ հանկարծ դրանք թվաբանական պրոգրեսիայով չաճեն:

Պետական մարմինները բազմիցս հայտարարել են, որ պետք է խթանեն երկրում փոքր ու միջին ձեռներեցության զարգացմանը, օգնեն ձեռնարկատերերին, նպաստեն, որ վերջիններիս արտադրած ապրանքը լինի մրցունակ տեղական շուկայում:

Օգնելը, սատարելն ու ուղղություն տալը գյուղնախարարի կողմից երևի ուղղակի էր ընկալվել և վերջինս ամիսներ առաջ շտապել էր գյուղացու մոտ, բացատրելու, թե կովին կթելուց առաջ ինչպես պետք է կուրծքը լվանալ, մշակել ու բարձրացնել կովերի կաթնատվությունը: Հարգարժան պաշտոնյան, սակայն, մոռացել էր նույն գյուղացուն հարցնել՝ «ջուր ունե՞ս հարգելիս, թե դեռ ոռոգման ջրով ես երեխայիդ համար ճաշ պատրաստում»: Բայց այդ մասին՝ հաջորդ դասին:

Պանրի մեջ աղիքային ցուպիկի մանրէներ հայտնաբերելու մասին Սննդամթերքի անվտանգության պետական ծառայության պետ Աբրամ Բախչագուլյանի հայտարարությանը հաջորդեց բժիշկների հայտարարությունը, թե աղիքային ցուպիկ կա ինչպես կենդանիների, այնպես էլ մարդկանց օրգանիզմներում: Այն տեղակայվում է հաստ աղիքում, որը նպաստում է օրգանիզմի նյութափոխանակությանը:

«Այն կարճ ժամանակահատվածում ոչնչանում է արտաքին միջավայրի ազդեցության և ջերմային մշակման ժամանակ: Պանիրը 40 օր մնում է աղաջրի մեջ, որից հետո նոր է հանվում վաճառքի: Եթե նույնիսկ կոլի ցուպիկ լինի պանրի մեջ, ապա այդ ժամանակահատվածում այն կոչնչանա»,- տեղեկացնում է բժիշկ Ալֆրեդ Բաբայանը:

Չնայած դրան, գնացքն արդեն մեկնել է, տուգանվողները տուգանվել են, Սննդամթերքի անվտանգության պետական ծառայության պետ Աբրամ Բախչագուլյանի տեղեկացմամբ ոչնչացվել է 5,5 տոննա պանիր, իսկ թվով 59 տնտեսվարող սուբյեկտների տուգանքից գոյացած ընդհանուր գումարը կազմել է 10 մլն 450 հազար դրամ:

Նորից պետական մահակի հարվածի տակ ընկան փոքր ու միջին ձեռնարկատերերը, իսկ խոշորները, ինչպես հայտնում է Սննդամթերքի անվտանգության պետական ծառայության պետ Աբրամ Բախչագուլյանը. «նման խնդիրներ չունեն»:

«Միակ նպատակը փոքր ձեռնարկատիրոջը ճնշելն է: Այն ժամանակ էլ թռչնի գրիպի մասին լուրեր էին տարածում, որ հավերը հիվանդ են, ձու մի գնեք, դա այն դեպքում, որ հիվանդ հավը ձու չի ածում:

Այդ ժամանակ բավականին անհատ ձեռնարկատերեր տուժեցին, փակվեցին նրանց ձեռնարկությունները: Խոզի ժանտախտի մասին լուրերը ևս մանր ձեռնարկատերերին վնասելու համար էին, որպեսզի վաճառվի դրսից ներկրված խոզի միսը»,- ասում է մասնագիտությամբ բժիշկ, Հայաստանի արհեստակցական միությունների կոնֆեդերացիայի ճյուղային միության նախագահ Ալֆրեդ Բաբայանը:

Նորի՞ց սայթաքում է սա, թե՞ միջազգային փորձի հատվածային ուսումնասիրության արդյունք, որն ավելի շատ հանգեցնում է փոքր ու միջին ձեռնարկություններին խեղդամահ անելուն, քան նպաստում է տնտեսության ոտքի կանգնելուն ու զարգացմանը:

Արմինե Գրիգորյան