Փաստ ինֆո

Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանը հիմնավորված է համարել խարդախության եղանակով պետական բյուջեից առանձնապես խոշոր չափերի գումար հափշտակելու համար Ի. Գևորգյանին առաջադրված մեղադրանքները և դատապարտել երկարատև ազատազրկման: Այդ մասին «Pastinfo.am»-ին տեղեկացրեցին ՀՀ գլխավոր դատախազությունից:

Դատարանում հետազոտված և հիմնավոր համարված ապացույցների համաձայն`  Ի. Գևորգյանը 2010թ. հուլիսից մինչև 2010թ. նոյեմբերի 3-ն ընկած ժամանակահատվածում Ս. Թազիյանի և այլ անձանց հետ խարդախության եղանակով պետական բյուջեից հափշտակել են առանձնապես խոշոր չափերի` 166 775 568 դրամ գումար, ինչպես նաև առևտրային կազմակերպության կառավարչական գործառույթներ իրականացնող ծառայողներին տվել են 3 525 000 դրամ առևտրային կաշառք:

ՀՀ կառավարության «Հարկային վարչարարության օժանդակության նպատակով վիճակահանության անցկացման և պարգևավճարների տրամադրման կարգը հաստատելու մասին» 30.10.2008թ. թիվ 1330-Ն որոշմամբ հաստատված կարգի համաձայն` Հայաստանի Հանրապետության տարածքում ապրանքներ և ծառայություններ անմիջականորեն ձեռք բերող ֆիզիկական անձանց կողմից ՀԴՄ կտրոնների վիճակահանությունների արդյունքում չշահած կտրոնները բոնուսների հաշվարկման նպատակով  մինչև 2010թ. ապրիլ ամիսն ընկած ժամանակահատվածում Ի. Գևորգյանը և Ս. Թազիյանը ներկայացրել են տարածքային հարկային տեսչություններ և ստացել կտրոնների վրա արտացոլված գործարքի լրիվ արժեքի մեկ տոկոսի չափով վճարվող բոնուսային գումար:

Հետագայում ՀԴՄ կտրոնների վիճակահանությունների արդյունքում չշահած կտրոնների դիմաց բոնուսների վճարման գործառույթն իրականացվել է «Հայփոստ» ՓԲ ընկերության փոստային բաժանմունքների կողմից:

Ի. Գևորգյանը մինչև 2010թ. հուլիս ամիսը տարածքային հարկային մարմիններում և մի շարք փոստային բաժանմունքներում անձամբ իր անձնագրով հանձնել է հավաքած ՀԴՄ կտրոնների խմբաքանակներ և ստացել բոնուսային գումարներ: 2010թ. հուլիսին Ի.  Գևորգյանը չշահած ՀԴՄ կտրոնների դիմաց պետական բյուջեից վճարվող առանձնապես խոշոր չափերի հասնող բոնուսային գումարները խարդախության եղանակով հափշտակելու վերաբերյալ նախնական համաձայնության  է եկել Ս. Թազիյանի հետ` ընդգրկվելով այդ նպատակով ստեղծված կազմակերպված կայուն խմբում:

Իրենց ինքնությունը չբացահայտվելու նպատակով Ի. Գևորգյանը դիմել է իր ուսանող ընկերներին և ՀԴՄ օրինական կտրոններ հանձնելու պատրվակով խնդրել նրանց տարբեր քաղաքացիներից անձնագրերի պատճեներ հավաքել: Վերջիններս, օգտագործելով իրենց մտերմական, ընկերական և հարազատական կապերը,   հավաքել են շուրջ 200-ից ավելի քաղաքացիների անձնագրերի պատճեներ: Իսկ Ի. Գևորգյանը որոշ քաղաքացիների շահագրգռելու համար յուրաքանչյուր պատճեի համար վճարել է 500-1000 դրամ:

Բացի այդ, Ի. Գևորգյանը Ս. Թազիյանից ստացել է տարբեր կազմակերպությունների 2-րդ և 3-րդ եռամսյակների ընթացքում ելքագրված և այդ ընկերությունների ֆիսկալային հաշվետվություններին չհամապատասխանող հսկիչ դրամարկղային մեքենաների կեղծ կտրոններ: Ապա դրանք ընդգրկելով այլ կազմակերպությունների կողմից ելքագրված օրինական ՀԴՄ կտրոնների խմբաքանակներում` նախապես հավաքված անձնագրերի պատճեներով հանձնել են «Հայփոստ» ՓԲ ընկերության Երևան քաղաքի փոստային բաժանմունքներ և խարդախությամբ հափշտակել  բոնուսային գումարներ:

Վերջիններս, տեղյակ լինելով, որ ըստ սահմանված կարգի  բոնուսային գումարները «Հայփոստ»-ի բաժանմունքներից ստանալու համար ենթակա են վճարման անձը հաստատող փաստաթուղթ ներկայացնելու պայմաններում,  «Հայփոստ» ՓԲ ընկերության Երևան քաղաքի փոստային բաժանմունքների աշխատակիցներին առաջարկել և որպես առևտրային կաշառք տվել են ընդհանուր առմամբ 3 525 000 դրամ գումար:

Արդյունքում խարդախության եղանակով պետական բյուջեից հափշտակել են ՀԴՄ կեղծ կտրոններ պարունակող կտրոնների խմբաքանակների դիմաց հաշվարկված առանձնապես խոշոր չափերի ընդհանուր 166 775 568 դրամ բոնուսային գումար:

Ի. Գևորգյանը  մեղավոր է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ի և 2-րդ կետերով և 200-րդ հոդվածի 2-րդ մասով: Սակայն «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 26.05.2011թ. որոշման 1-ին կետի 1-ին ենթակետի կիրառմամբ Ի. Գևորգյանն ազատվել է ՀՀ քրեական օրենսգրքի 200-րդ հոդվածի 2-րդ մասով նշանակված ազատազրկում 3/երեք/ տարի ժամկետով պատժի կրումից, և դատարանը նրա նկատմամբ վերջնական պատիժ է սահմանել ազատազրկում` 6 տարի 6 ամիս ժամկետով:

Ս. Թազիյանի նկատմամբ դեռևս նախաքննության փուլում հայտարարվել էր հետախուզում: Փոստային բաժանմունքների պատասխանատու անձանցից 4-ի  վերաբերյալ կայացվել են մեղադրական դատավճիռներ, 4-ի վերաբերյալ դատաքննությունը շարունակվում է, իսկ ևս 5 աշխատակիցների վերաբերյալ շարունակվում է քրեական գործի նախաքննությունը: