Փաստ ինֆո

Ազգային ժողովի վեց խմբակցությունների ղեկավարներից ամենաշատ ունեցվածք հայտարարագրածը «Բարգավաճ Հայաստան» խմբակցության ղեկավար և նույնանուն կուսակցության առաջնորդ Գագիկ Ծառուկյանն է: Նա ընդհանրապես ամենաշատ թանկարժեք գույք, եկամուտ և դրամական միջոցներ, արժեթղթեր և ներդրումներ հայտարարագրած պատգամավորն է: Ամենահամեստ ունեցվածքի տերերը «Ժառանգություն» և ՀՀԿ խմբակցությունների ղեկավարներ Ռուբիկ Հակոբյանն ու Գալուստ Սահակյանն են:

Ըստ «parliamentmonitoring.am» կայքում տեղադրված հայտարարագրերի, Ռ.Հակոբյանն ու Գ.Սահակյանը նախընտրական շրջանում հայտարարագրերը ներկայացնելու օրվա` ընթացիկ տարվա մարտի 3-ի, դրությամբ չեն ունեցել դրամական միջոցներ, անշարժ և թանկարժեք գույք, արժեթուղթ կամ այլ ներդրում: Երկուսն էլ հայտարարագրել են մեկական ավտոմեքենա` համապատասխանաբար «Միթսուբիշի Pajero» և «Նիսան-Մաքսիմա»: Ի տարբերություն «Ժառանգություն» խմբակցության ղեկավարի, ով չի ունեցել նաև եկամուտներ, ՀՀԿ խմբակցության ղեկավարը որպես տարեկան դրամական եկամուտ հայտարարագրել է 3 մլն 109 հազար 700 դրամ պատգամավորի աշխատավարձ և 258 հազար դրամ կենսաթոշակ:

Թանկարժեք և շարժական գույք, արժեթուղթ կամ այլ ներդրում, ըստ հայտարարագրերի, չունեն «Օրինաց երկիր» խմբակցության ղեկավար Հեղինե Բիշարյանը, «Հայ ազգային կոնգրես» խմբակցության ղեկավար Լևոն Զուրաբյանը և «Հայ Յեղափոխական Դաշնակցություն» խմբակցության ղեկավար Արմեն Ռուստամյանը:

Լ. Զուրաբյանը որպես անշարժ գույք հայտարարագրել է Երևանում 240 քմ մակերեսով 1 տուն` տնամերձ հողամասով, և 1 բնակարան` 72 քմ մակերեսով:

Ա.Ռուստամյանը հայտարարագրել է 1 բնակարան` 98.52 քմ մակերեսով:

Ի տարբերություն նրանց, Հ. Բիշարյանը չունի նաև անշարժ գույք:

Լ. Զուրաբյանի տարեկան եկամուտը կազմել է 945 հազար 480 դրամ, դրամական խնայողությունները հայտարարագիրը ներկայացնելու օրվա դրությամբ` 2 մլն 500 հազար դրամ:

Հ. Բիշարյանի տարեկան դրամական եկամուտը գոյացել է պատգամավորի աշխատավարձի գումարից` 3 մլն 609 հազար 40 դրամ: Դրամական միջոցները հայտարարագիրը ներկայացնելու օրվա դրությամբ` 32 հազար ԱՄՆ դոլար:

Ա.Ռուստամյանի հաշվետու տարվա դրամական եկամուտը նույնպես գոյացել է պատգամավորի աշխատավարձի գումարից` 3 մլն 451 հազար 520 դրամ:

Դրամական միջոցները հայտարարագիրը ներկայացնելու օրվա դրությամբ` 15 մլն ՀՀ դրամ, 9000 ԱՄՆ դոլար և 1500 եվրո:

Ամենաշատ թանկարժեք գույք, եկամուտ և դրամական միջոց, արժեթուղթ և ներդրում հայտարարագրածը, ինչպես նշել էինք, «Բարգավաճ Հայաստան» խմբակցության ղեկավարն է: Գագիկ Ծառուկյանը հայտարարագրել է 6 շենք` մոտ 9000 քմ ընդհանուր մակերեսով և 9 հողամաս:

Նա ունի 7 ավտոմեքենա` «BMW X -5», «Տոյոտա Պրադո V-6», «Ջիպ Վրանգլեր P 6-4.0», «Ռոլլս-Ոոյս B 12-6.7», «Նիսան Պատրուլ», «Ռոլլս-Ռոյս կուպե ֆանտոմ», «Ռենջ Ռովեր սպորտ 4.4»:

Թանկարժեք գույք բաժնում հայտարարագրել է ննջարանի 8 և ճաշասենյակի 2 կահույք` 811 հազար 750 եվրո ընդհանուր արժողությամբ: Նույն բաժնում հայտարարագրել է նաև տղամարդու` ադամանդե քարով 3 ոսկե մատանի` 4 մլն 700 հազար ԱՄՆ դոլար ընդհանուր արժողությամբ, 3 ձեռքի ժամացույց, որոնց ընդհանուր արժեքը 1 մլն 300 հազար ԱՄՆ դոլար է:

Տարեկան դրամական եկամուտը` 5 մլրդ 956 մլն 499 հազար 676 ՀՀ դրամ, որից 3 մլն 135 հազար 310 դրամը` պատգամավորի աշխատավարձ, 60 մլն 81 հազար 830 ԱՄՆ դոլար և 40 մլն եվրո` փոխառություն, շահաբաժին, վարձավճար:

Դրամական միջոցները հայտարարագիրը ներկայացնելու օրվա դրությամբ` 1 մլրդ 161 մլն ՀՀ դրամ, 30 մլն 730 հազար ԱՄՆ դոլար և 20 մլն 483 հազար եվրո:

Ունի բաժնեմաս 33 ընկերություններում: Դրանցից «Մուլտի գրուպ» կոնցեռնում, «Մուլտի գրուպ Սթոուն» ՓԲԸ-ում, «Մուլտի Մոթորս» ՍՊԸ-ում, «Բելլեզզա» ՍՊԸ-ում, «Կոտայք» գարեջրի գործարանում, «Մուլտի Դիսթրիբյուշն» ՍՊԸ-ում, «Հոթել Ռիգա» ՍՊԸ-ում, «Միրա Ջի» ՍՊԸ-ում ներդրման չափը 100% է: