Փաստ ինֆո

Կառավարության այսօրվա նիստը վարչապետ Տիգրան Սարգսյանն սկսեց սննդի անվտանգության հարցերից: «Մենք պայմանավորվել ենք, որ պարբերաբար այս հարցին անդրադառնալու ենք, որովհետև սննդի անվտանգության ոլորտում մենք ստանձնել ենք կարևորագույն պարտավորություն, որ պետք է երաշխավորենք մեր քաղաքացիներին, որ ՀՀ-ում վաճառվող սնունդը որակյալ է և անվտանգ: Ցավոք սրտի, մենք դեռևս ունենք լրջագույն խնդիրներ. այսօր մենք ՀՀ-ում ներ ենք դնում մոնիթորինգի համակարգ, որպեսզի իշխանությունները պարբերաբար իրականացնեն ստուգումներ սնունդ արտադրողների մոտ, և եթե հայտնաբերում են խախտումներ, շեղումներ նորմերից, հանրությանը դրա մասին տեղյակ պահենք»:

Վարչապետի խոսքից հետո սննդի անվտանգության պետական վարչության պետ Աբրամ Բախչագուլյանը ներկայացրեց պանրի ոլորտում արված ուսումնասիրությունները: Ըստ նրա` սեպտեմբեր-հոկտեմբեր ամիսներին պանրի արտադրությամբ զբաղվող թվով 59 տնտեսվարող սուբյեկտների մոտ տեսչական ստուգումներ են իրականացվել: «59 տնտեսվարող սուբյեկտի մոտ հայտնաբերվել են խախտումներ, որոնք վերաբերում էին թե՛ սանիտարահիգիենիկ, թե՛ մակնշման, թե՛ պահման պայմանների չկատարման հետ կապված խնդիրներին: Ստուգումների արդյունքում թվով 18 տնտեսվարող սուբյեկտի գործունեությունն արգելվել է` առանձին արտադրության կամ ամբողջ արտադրության կտրվածքով»,- նշեց Աբրամ Բախչագուլյանը: Ըստ նրա` այդ տնտեսվարող սուբյեկտների մոտ կատարվել են նմուշառումներ, լաբորատոր փորձաքննության արդյունքում հայտնաբերվել են աղիքային ցուպիկի մանրէներ` մեծամասամբ չանախ պանրի արտադրատեսակի հետ կապված: 5.5 տոննա պանիր ոչնչացվել է, և տվյալ ընկերությունները ներկայումս իրականացնում են սանիտարահիգիենիկ պայմանների կատարման աշխատանքներ` ծառայության համապատասխան տեսուչների վերահսկողության ներքո: Թվով 59 տնտեսվարող սուբյեկտները ենթարկվել են վարչական պատասխանատվության, կիրառվել է տուգանք. ընդհանուր գումարը կազմել է 10 մլն. 450 հազար դրամ:

Վարչապետը սննդի անվտանգության պետին հարցրեց, թե ինչ վտանգ են դրանք ներկայացնում առողջության համար: Աբրամ Բախչագուլյանի խոսքով՝ տեխնիկական կանոնակարգով գոյություն ունի աղիքային ցուպիկի սահմանված թույլատրելի չափ: «Աղիքային ցուպիկի մանրէների թույլատրելի քանակը գերազանցում է, որը բնակչության մոտ մարսողական համակարգի խնդիրներ է առաջացնում»: Սննդի անվտանգության պետական վարչության պետի խոսքով՝ դրանք այն ընկերություններն են, որոնք ունեն փոքր արտադրական ծավալներ, փոքր ձեռնարկություններ են և չեն ապահովում սանիտարահիգիենիկ նորմերը, որոնք ներկայացված են ՀՀ կառավարության համապատասխան որոշմամբ: Ըստ Ա. Բախչագուլյանի` խնդիրներ են եղել նաև մակնշման հետ կապված: «Քանի որ ընկերություններն օրական արտադրում էին մոտավորապես 60-75 կգ պանիր, այդ պանիրները հավուր պատշաճի մակնշված չեն,  և խմբաքանակ որպես այդպիսին չի երևում, որ կարողանանք հետկանչ կազմակերպենք: Այդ խմբաքանակի հետ կապված բոլոր առաջադրանքները տրվել են և բոլոր 59 ընկերություններում արտադրված արտադրանքի խմբաքանակը պետք է պարտադիր մակնշված լինի, որպեսզի մենք կարողանանք ապահովել հետագծելիությունը և հետկանչը շուկայից»,-նշեց Աբրամ Բախչագուլյանը:

Վարչապետը Բախչագուլյանի ելույթից հետո ասաց. «Վնաս է հասցնում առողջությանը, ու դեռ դրա համար էլ վճարո՞ւմ են մեր քաղաքացիները, որ այդ պանիրը օգտագործելուց հետո առաջանում են հիվանդություններ: Մենք պետք է հրապարակային դարձնենք այդ արտադրողների անունները, ձեռնարկությունների անունները, պանրի տեսակի անվանումը, որ քաղաքացիները չօգտվեն դրանցից»:

Ըստ Բախչագուլյանի՝ խոշոր արտադրողների մոտ սանիտարահիգիենիկ նորմերի պահանջների կատարման նկատմամբ վերահսկողության արդյունքում պարզ է դարձել, որ խոշոր արտադրողներն ավելի պարտաճանաչ են, և մարսողական համակարգի հետ կապված խնդիրներ իրենց կողմից արտադրված արտադրանքում չեն առաջացնում, որովհետև ներդրել են անվտանգության համակարգերը և կարողանում են ապահովել սանիտարահիգիենիկ պահանջների նկատմամբ հսկողությունը: «Մեր խնդիրը փոքր արտադրություններն են, սակայն մենք պարբերարաբար հսկողության տակ ենք առնում այդ արտադրությունները, և պետք է նշեմ, որ Լոռու մարզում, բացի գրանցված տնտեսվարող սուբյեկտներրից, կային նաև այլ գյուղացիական տնտեսություններ, որոնք արտադրում էին պանիր, բայց գրանցված չէին, և այդ ընկերություններում օրենքի պահանջի ստուգումներ չկարողացանք իրականցնել»,-ասաց Բախչագուլյանը:

Տիգրան Սարգսյանը հետաքրքրվեց, թե պատժամիջոցները, որոնք այսօր օրենսդրությունը տրամադրում է, բավարա՞ր են, թե՞ անհրաժեշտ է խստացնել օրենսդրությունը, որին ի պատասխան՝ Բախչագուլյանն ասաց. «Մեր կարծիքով անհրաժեշտ է խստացնել, քանի որ պահանջների կատարման նկատմամբ վերահսկողության արդյունքում մենք չենք կարողանում դադարեցնել այս կամ այն արտադրատեսակի արտադրությունը: Միայն եթե հայտնաբերում ենք վտանգավոր սննդամթերք, այդ դեպքում ենք կարողանում կասեցնել այդ արտադրությունը կամ առանձին արտադրատեսակի արտադրությունը: Եթե մենք 59 տնտեսվարող սուբյեկտներից այս 18-ում ենք հայտնաբերել լաբորատոր փորձաքննության արդյունքում վտանգավոր սննդամթերք, չի բացառվում, որ եթե վաղը գնանք, մյուս 41-ում նորից լինեն այս խնդիրները, որովհետև խնդիրները մեծ մասամբ պայմանավորված են սանիտարահիգիենիկ նորմերի չկատարմամբ: Իսկ դրա նկատմամբ մեր օրենսդրությունը սահմանում է միայն վարչական պատասխանատվություն, բոլոր տնտեսվարող սուբյեկտները վարչական պատասխանատվության ենթարկվել են, սակայն իրենց տրվել է առաջադրանք վերացնել խախտումները, սակայն օրենսդրությունը չի սահմանել՝ ինչ տոկոսով պետք է վերացնել այդ խախտումները, որ կարողանան նորից սկսել արտադրությունը»,-ասաց սննդի անվտանգության վարչության պետը: