Փաստ ինֆո

ՌԴ քննչական կոմիտեն հայտարարել է, որ «Оборонсервис»-ի գործով կասկածյալների թիվը շուտով կավելանա: «Քրեական գործում դերակատարություն ունեցող ինչ-որ մարդիկ մոտ ժամանակներս կփոխեն վկայի իրենց կարգավիճակը և կվերածվեն մեղադրյալի:

Իսկ այս պահին ՊՆ «Оборонсервис» ԲԲԸ-ին պատկանող անշարժ գույքի և հողամասերի վաճառքի հետ կապված քննությունն այն եզրակացության է եկել, որ հանցագործությունները կատարել են միևնույն անձինք:

Դրա հետ կապված, քրեական գործի ամբողջությունը և բազմակողմանիությունն ապահովելու համար հարուցված բոլոր 5 քրեական գործերը միացվել են մեկ գործընթացի մեջ: Այժմ վարույթն ընթանում է խարդախություն, պաշտոնեական դիրքի չարաշահում, պաշտոնեական իրավասությունների գերազանցում, իրավասությունների չարաշահում հանցատեսակները ՌԴ քրեական օրենսգրքում սահմանող հատկանիշներով:

Հայտարարության մեջ նշվում է, որ առայժմ այս աղմկահարույց գործում հանդես են գալիս երկու կասկածյալներ՝ «Էքսպերտ» իրավական պաշտպանության կենտրոն» առևտրային կազմակերպության նախկին ղեկավար Եկատերինա Սմետանովան և ՌԴ օդային ուժերի Մոսկվայի տարածաշրջանի պահեստի գլխավոր տնօրեն Մաքսիմ Զակուտայլոն: Քննությունը նախապատրաստվում է մոտ ժամանակներս նրանց ներկայացնել մեղադրանք:

Այժմ ակտիվ քննչական գործողություններ են իրականացվում ՊՆ գույքային հարաբերությունների դեպարտամենտում, ինչպես նաև «Оборонсервис»-ի ենթակա Մոսկվայի հաստատություններում, թեև քննչական գործողություններ են ընթանում նաև Սանկտ- Պետերբուրգում, Մոսկվայի մարզում, Կրասնոդարի երկրամասում:

Նշենք, որ նախաքննության աշխատանքներ կատարվում են ՊՆ-ի ղեկավարության հետ հաստատված ակտիվ համագործակցության պայմաններում, նշում է ՌԴ քննչական կոմիտեի մամլո ծառայությունը:

Հիշեցնենք, որ խոսքը Ռուսաստանի ՊՆ-ում տնտեսական օրինազանցությունների մեծ աղմուկ հանած դեպքի մասին է, որտեղ որպես գործող անձ հանդես էր գալիս նաև այժմ արդեն աշխատանքից ազատված նախկին նախարար Անատոլի Սերդյուկովը:

Այս գործի մասին հայտնի դարձավ հոկտեմբերի 25-ին, երբ ՌԴ ՊՆ-ի «Оборонсервис» ընկերության աշխատակիցների դեմ հարուցվեց 5 քրեական գործ: Համաձայն քննության վարկածի, ընկերությունը չափազանց ազատ է վարվել ՌԴ պաշտպանության նախարարության անշարժ գույքի և հողերի հետ: Իրականացվել են խուզարկություններ նախարարության գույքային հարաբերությունների դեպարտամենտի նախկին ղեկավար Եվգենիա Վասիլևայի բնակարանում, ով ապրում է ՌԴ պաշտպանության նախարար Անատոլի Սերդյուկովի հետ նույն շենքում:

Տեղեկատվության մեջ նշվում էր, որ, օրինակ՝ հոկտեմբերի 25-ին հարուցված քրեական գործերի շրջանակում կատարված հաշվարկներում պարզվել է, որ միայն 8 օբյեկտների հետ կատարված խարդախ գործարքների արդյունքում պետությանը հասցված վնասը գնահատվում է 3 մլդ. ռուբլի: Նշենք, որ նման օբյեկտների ընդհանուր թիվը չի նշվում: