Փաստ ինֆո

Նոյեմբերի 7-ին ԱԺ պաշտպանության, ազգային անվտանգության և ներքին գործերի մշտական հանձնաժողովի նիստում Կորյուն Նահապետյանի նախագահությամբ քննարկվեց ՀՀ կառավարության ներկայացրած «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ և փոփոխություն կատարելու մասին» օրինագիծը: Այդ մասին տեղեկացնում են ԱԺ հասարակայնության և տեղեկատվության միջոցների հետ կապերի վարչությունից:

Օրենքի նախագծով, ինչպես ներկայացրեց հիմնական զեկուցողը՝ ՀՀ գլխավոր դատախազի տեղակալ Արամ Թամազյանը, վարչական պատասխանատվություն է նախատեսվում տրանսպորտային միջոցների տեխնիկական զննություն իրականացնող կազմակերպությունների կողմից զննություն անցած պաշտպանության նպատակով ներգրավվող տրանսպորտային միջոցների և դրանց տեխնիկական վիճակի վերաբերյալ տվյալները, ռազմատրանսպորտային պարտականություն ունեցող մարմինների կողմից վարժական հավաքներին, հրամանատարաշտաբային, շտաբային վարժանքներին կամ զորախաղերին ներգրավված տրանսպորտային միջոցները համապատասխան զինվորական կոմիսարիատ ժամանակին և սահմանված ձևով չներկայացնելու համար: Միաժամանակ վարժական հավաքներից, հրամանատարաշտաբային, շտաբային վարժանքներից կամ զորախաղերից խուսափած քաղաքացիների և ռազմատրանսպորտային պարտականություն ունեցող մարմինների վարչական իրավախախտումների վերաբերյալ գործերը քննող մարմիններ են սահմանվում զինվորական կոմիսարները:

Նախագծի ընդունումը կապահովվի գործող իրավական ակտերի պահանջների կատարումը, կնպաստի զորահավաքային նախապատրաստության միջոցառումների կազմակերպման արդյունավետության բարձրացմանը:

Հանձնաժողովի անդամ Գագիկ Ջհանգիրյանն առաջարկեց վարչական պատասխանատվություն սահմանել ոչ միայն ռազմատրանսպորտային պարտականություն ունեցող մարմինների պաշտոնատար անձանց, այլև բոլոր կազմակերպությունների և ֆիզիկական անձանց համար, ովքեր «Պաշտպանության մասին» օրենքով՝ ծանուցագրերի հիման վրա տրանսպորտային միջոցները ժամանակին և սահմանված վայր ներկայացնելու պարտականություններ ունեն:

ՀՀ գլխավոր դատախազի տեղակալ Արամ Թամազյանը հավաստիացրեց, որ առաջարկը կքննարկվի կառավարությունում և հավանության արժանանալու դեպքում մինչև օրինագծի երկրորդ ընթերցմամբ քննարկումը կներառվի նախագծում:

Հանձնաժողովը դրական եզրակացություն տվեց օրինագծին առաջիկա քառօրյա նիստերի օրակարգում ընդգրկվելու համար:

Հանձնաժողովը քննարկեց նաև 2013 թվականի ՀՀ պետական բյուջեի՝ պետական և ծառայողական գաղտնիք պարունակող ծախսերի օրինականության և հիմնավորվածության մասին հարցը և տվեց դրական եզրակացություն: Հանձնաժողովի անդամները բյուջեի վերաբերյալ առաջարկներ չունեին:

Նույն օրը ԱԺ տարածքային կառավարման և տեղական ինքնակառավարման հարցերի մշտական հանձնաժողովը Ստեփան Մարգարյանի նախագահությամբ քննարկեց «ՀՀ 2013 թվականի պետական բյուջեի մասին» ՀՀ օրենքի նախագծով նախատեսված տարածքային կառավարման մարմինների ֆինանսավորման և համայնքներին դոտացիաներ տրամադրելու վերաբերյալ առաջարկությունների հարցը:

Հանձնաժողովի նախագահ Ստեփան Մարգարյանը տեղեկացրեց, որ հանձնաժողովը բյուջեի վերաբերյալ առաջարկներ չի ստացել ոչ համայնքներից, ոչ պատգամավորներից:
ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովը Արտակ Դավթյանի նախագահությամբ քննարկեց ՀՅԴ պատգամավորների հեղինակած «Կրթության մասին» և հարակից օրենքներում փոփոխություններ առաջարկող նախագծերի փաթեթը: Փոփոխությունը խմբագրական բնույթի է. մասնավորապես առաջարկվում է «Նախնական մասնագիտական և միջին մասնագիտական կրթության մասին» ՀՀ օրենքի 4-րդ հոդվածի 3-րդ մասում «սահմանամերձ և բարձր լեռնային» բառերը փոխարինել «սահմանամերձ կամ բարձր լեռնային» բառերով, իսկ նույն օրենքի 15-րդ հոդվածի 11-րդ կետում «ինչպես նաև սահմանամերձ և բարձր լեռնային» բառերը՝ «սահմանամերձ, ինչպես նաև բարձր լեռնային» ձևակերպմամբ: Ինչպես ներկայացրեց նախագծի համահեղինակ Աղվան Վարդանյանը, նշված հոդվածների թյուրընկալման նախադեպեր են եղել, ուստի ուղղում կատարելու անհրաժեշտություն է առաջացել:

Քվեարկության արդյունքում հանձնաժողովը դրական եզրակացություն տվեց նախագծերի փաթեթին՝ ԱԺ նստաշրջանի և առաջիկա չորսօրյա նիստերի օրակարգերում ընդգրկելու համար:

«Պետական օժանդակության ուսումնական վարկերի մասին» և հարակից օրենքներում փոփոխություններ և լրացումներ կատարելու մասին օրինագծերի փաթեթի քննարկումը հեղինակների՝ «Օրինաց երկիր» կուսակցության ներկայացուցիչների առաջարկով հետաձգվեց մինչև մեկ տարի ժամկետով:

ՀՀ ԱԺ արտաքին հարաբերությունների մշտական հանձնաժողովը Արտակ Զաքարյանի նախագահությամբ նոյեմբերի 7-ին ամփոփեց «2013թ. պետական բյուջեի մասին» ՀՀ օրենքի նախագծի՝ արտաքին հարաբերությունների ոլորտին վերաբերող քննարկումների արդյունքները:

Հանձնաժողովի անդամները բյուջեի նախագծի վերաբերյալ առաջարկներ չեն ներկայացրել: