Փաստ ինֆո

Ազգային ժողովի պատգամավորների` պատգամավորության թեկնածուներ գրանցվելու համար ներկայացված գույքի և եկամուտների հայտարարագրերից պարզ է դառնում, որ հայտարարագրված շարժական գույքի մասով «առաջատարը» «Բարգավաճ Հայաստան» խմբակցության անդամ, Միավորված աշխատանքային կուսակցության նախագահ Գուրգեն Արսենյանն է: Ըստ parliamentmonitoring.am կայքի, նա ընթացիկ տարվա մարտի 3-ին հայտարարագրել է «Զենեյր CH-701STOL» մակնիշի 2 ինքնաթիռ և 3 ավտոմեքենա` «Լեքսուս LS600HL», «Ռենջ Ռովեր Super Gharego», «Տոյոտա Պրադո»:

Գուրգեն Արսենյանը, բացի ինքնաթիռներից և ավտոմեքենաներից, հայտարարագրել է նաև 6 շենք - շինություն՝ Երևանում, Գյումրիում, Թբիլիսիում` ընդհանուր 2088.39 քմ մակերեսով, 8 հողամաս` մոտ 253 հա տարածքով:

Պատգամավորի տարեկան դրամական եկամուտը 1 մլրդ 190 մլն 464 հազար 824 դրամ է (շահաբաժին, վարձավճար, տոկոսներ):

Դրամական միջոցները հայտարարագիրը ներկայացնելու օրվա դրությամբ` 35 մլն 233 հազար 242 ՀՀ դրամ, 6 մլն 253 հազար 17 ԱՄՆ դոլար, 23 հազար 138 եվրո:

Ունի 100% բաժնետոմս «ԱՐՍՕՅԼ» և «Յունիքորն թրեյդ» ՓԲԸ-ներում, 50%` «Յունիքորն գրուպ», «Յունիքորն փրինթ», «Յունիքորն ֆլորա», «Յունիքորն թեքնոլոջի», «Յունիքորն քոնսթրաքշն», «Աննալուս» ՓԲԸ-ներում, նաև 85% բաժնետոմս` «Գրանդ տոբակո» ՓԲԸ-ում (Տաջիկստան):

Համեմատության կարգով նշենք, որ պատգամավորների մի մասը շարժական գույք ընդհանրապես չի հայտարարագրել, իսկ ամենաշատ թանկարժեք գույք, եկամուտ և դրամական միջոցներ, արժեթղթեր և ներդրումներ հայտարարագրած «Բարգավաճ Հայաստան» կուսակցության առաջնորդ և նույնանուն խմբակցության ղեկավար Գագիկ Ծառուկյանը հայտարարագրել է 7 ավտոմեքենա` BMW X -5, Տոյոտա Պրադո V-6, Ջիպ Վրանգլեր P 6-4.0, Ռոլլս-Ոոյս B 12-6.7, Նիսան Պատրուլ, Ռոլլս-Ռոյս կուպե ֆանտոմ, Ռենջ Ռովեր սպորտ 4.4: