Փաստ ինֆո

ՌԴ նախագահ Վլադիմիր Պուտինը աշխատանքից ազատել է պաշտպանության նախարար Անատոլի Սերդյուկովին: Ռուսաստանի ռազմական գերատեսչության նոր ղեկավար է նշանակվել բանակի 57-ամյա գեներալ Սերգեյ Շոյգուն:

Այս փոփոխության առթիվ նախագահ Պուտինը նշել է, որ վերջին շրջանում ՊՆ-ի շուրջ ստեղծված իրավիճակը, պահանջում է ապահովել օբյեկտիվ հետաքննություն անցկացնելու համար անհրաժեշտ պայմաններ: Պետք է տրվեն այն բոլոր հարցերի պատասխանները, որոնք այդ իրավիճակի հետ են կապված:

Ս. Շոյգուն, ով մինչ այս նշանակումը Մոսկվայի նահանգի ղեկավարն էր, այժմ արագ պետք է լուծի իր ժամանակավոր իրավահաջորդի՝ նահանգապետի պարտականությունները կատարողի խնդիրը, մինչև մեկ տարի հետո Մերձմոսկվայի ղեկավար կընտրվի քաղաքացիների կողմից:

Հիշեցնենք, որ «Pastinfo.am»-ը հոկտեմբերի 30-ին տեղեկացրել էր Ռուսաստանի ՊՆ-ում տնտեսական օրինազանցությունների մեծ աղմուկ հանած դեպքի մասին, որտեղ որպես գործող անձ հանդես էր գալիս նաև այժմ արդեն աշխատանքից ազատված նախկին նախարար Անատոլի Սերդյուկովը:

Տեղեկատվության մեջ խոսք էր գնում, որ հոկտեմբերի 25-ին ՌԴ-ում հայտնի դարձան «Оборонсервис» ընկերության աշխատակիցների դեմ հարուցված 5 քրեական գործերը: Համաձայն քննության վարկածի, ընկերությունը չափազանց ազատ է վարվել ՌԴ պաշտպանության նախարարության անշարժ գույքի և հողերի հետ: Իրականացվել են խուզարկություններ նախարարության գույքային հարաբերությունների դեպարտամենտի նախկին ղեկավար Եվգենիա Վասիլևայի բնակարանում, ով ապրում է ՌԴ պաշտպանության նախարար Անատոլի Սերդյուկովի հետ նույն շենքում:

Տեղեկատվության մեջ նշվում էր, որ, օրինակ՝ հոկտեմբերի 25-ին հարուցված քրեական գործերի շրջանակում կատարված հաշվարկներում պարզվել է, որ միայն 8 օբյեկտների հետ կատարված խարդախ գործարքների արդյունքում պետությանը հասցված վնասը գնահատվում է 3 մլդ. ռուբլի: Նշենք, որ նման օբյեկտների ընդհանուր թիվը չի նշվում: