Փաստ ինֆո

Երեկ ՀՀ Վարչապետ Տիգրան Սարգսյանը հայտարարեց, որ մեր երկրում առկա կոռուպցիայի դեմ պայքարն ուժեղացվելու է, և վճռական գործողություններ իրականացնելու համար «կիրառվելու են վիրահատական մեթոդներ»: Սակայն հետաքրքիր է, թե արդյոք «օրգանիզմը» կդիմանա՞: Վարչապետի ակնարկը «կույրաղիքի՞» վիրահատությանն է վերաբերում, թե՞ «սրտի», և վերջապես վիրահատական միջամտությունը ընդհանուր ցավազրկմա՞մբ կիրականացվի, թե ընդամենը տեղային թեթև թմրեցմամբ:

Ինչու է զինվորը խուսափում ծառայել բանակում, իսկ զինապարտության տարիքի երեխա ունեցող ծնողը ձեռքերը փրփուրներին գցելով «օգնում», որ իր երեխան փողոցում արևածաղիկի սերմ ուտելը նախընտրի հայրենիքի առջև պարտքը կատարելուց: Ինչու՞ է քիչ թե շատ կրթություն ստացած երիտասարդի երազանքների երազանքը դարձել սեփական երկրից փախչելը: Որովհետև մարդիկ մեծից փոքր անպաշտպանության ու լքվածի, արհամարհվածի զգացողությամբ են համակված:

Ու՞մ են պետք պետբյուջեից սնվող հսկայածավալ գերատեսչություններն իրենց «արբանյակ» կառույցներով ու ԾԻԳ-երով, եթե դրանք չեն ծառայում մարդկանց, կամ լավագույն դեպքում ծառայում են գերատեսչություններում աշխատողների ընտանիքներին, հարազատներին, մոտիկ-ծանոթներին: Սեփական երկրում գործող օրենքների ու կառավարության որոշումների մասին իմանալը քաղաքացիների համար դարձել է թանկարժեք «ինֆորմացիա», իսկ դրանցից օգտվելը….

Օրերս, պատահականության սկզբունքով հայտնաբերեցինք, որ զինվորական ծառայության մեջ գտնվողի ընտանիքի անդամները ևս ընդգրկված են ՀՀ կառավարության 2004թվականի թիվ 318-Ն որոշմամբ հաստատված պետության կողմից երաշխավորված անվճար բժշկական օգնություն և սպասարկում ստանալու իրավունք ունեցող բնակչության սոցիալապես անապահով ու առանձին (հատուկ) խմբերի ցանկում և օգտվում են անվճար հիվանդանոցային բժշկական օգնություն ու հատուկ և դժվարամատչելի հետազոտություններ ստանալու իրավունքից:

«Հատուկ և դժվարամատչելի ախտորոշիչ հետազոտություններ» ծրագրի շրջանակներում, զինծառայողների ընտանիքի անդամներն իրավունք ունեն անվճար հետազոտություն անցնել ՀՀ առողջապահության նախարության կողմից պետական պատվեր տեղադրված թվով 24 բուժհաստատություններում: Ի դեպ` բուժհաստատությունների մատուցած ծառայություններում ներառված են նաև 150 հազարից -175 հազար դրամ արժողություն ունեցող հետազոտություններ, մասնավորապես` կորոնարոանգիոգրաֆիա, 110 հազար դրամ արժեք ունեցող մագնիսական-ռեզոնանսային տոմոգրաֆիա /ներառյալ նաև հիվանդի անզգայացման և կոնտրաստ նյութի արժեքը/, 70 հազար դրամ արժեք ունեցող անգիոգրաֆիկ կոմպյուտերային տոմոգրաֆիա` 2 հատվածի / ներառյալ կոնտրաստ նյութի արժեքը/ և այլն:

Չկա մի գյուղ, ով զինվոր չունենա, չկա մի շենք ուր չի ապրում զինվորի ընտանիք: Թակեք բոլորի դռներն ու հարցրեք նրանցից քանիսը գիտեն այս մասին և քանիսն են մինչ այսօր օգտվել իրենց իրավունքից:

Սովորական քաղաքացուն առանձնապես հետաքրքիր էլ չէ, թե կառավարության «օրգանիզմի» որ հատվածն է ավելի ախտահարված: Մարդիկ ուզում են օր առաջ իրենց մաշկի վրա զգալ փոփոխությունների արդյունքները և ապահովագրված լինեն դրանից բխող կոռուպցիոն տորնադոյից: Ինչու են ընդունվում տարատեսակ օրենքներ, կայացվում որոշումներ, եթե դրանք մնում են պաշտոնյաների դարակներում և շարունակում մնալ անհասանելի սեփական երկրում մի կերպ գոյությունը պաշտպանող ժողովրդի համար:

Մարդկանց տեղեկատվական վակուումի մեջ պահելը, ինչ է, եթե ոչ հզոր կոռուպցիոն ռիսկի աղբյուր: Քանի դեռ քաղաքացին չգիտի, որ դեպքում ինչ անի և ում դուռը թակի, չգիտի ինչ իրավունքներ ունի, ոչինչ էլ չի ստացվի:

Արմինե Գրիգորյան