Փաստ ինֆո

Առաջիկայում հնարավոր է, որ Հայաստանի քաղաքացիները Չեխիա մուտքի արտոնագիր ստանալու համար ստիպված չլինեն մեկնել Վրաստան` այդ երկրում Չեխիայի դեսպանատուն դիմելու համար:

Ինչպես նոյեմբերի 2-ի ասուլիսում հայտնեց Ազգային ժողովի նախագահ Հովիկ Աբրահամյանը` ամփոփելով Չեխիա իր գլխավորած պատվիրակության եռօրյա այցի արդյունքները, Պրահայում պայմանավորվածություն է ձեռք բերվել, որ Չեխիայի ԱԳՆ-ն կքննարկի Երևանում բացված այդ երկրի հյուպատոսությանը մուտքի արտոնագրեր տրամադրելու լիազորություն վերապահելու հարցը:

ԱԺ նախագահը տեղեկացրեց նաև, որ այսօր ստորագրել է Չեխիայի Հանրապետության Սենատի և Ներկայացուցիչների պալատի նախագահներին, իրենց հարմար ժամկետներում, Հայաստան այցելելու հրավերքները:

Հ.Աբրահամյանին ուղղված լրագրողների հարցերը բացառապես վերաբերում էին 2013թ.-ին Հայաստանում անցկացվելիք նախագահական ընտրություններին և ներքաղաքական այլ հարցերին:

Նա վերահաստատեց, որ դեկտեմբերի 15-ին գումարվելիք ՀՀԿ համագումարում կուսակցությունը կընդունի առաջիկա նախագահական ընտրություններում գործող նախագահ, կուսակցության ղեկավար Սերժ Սարգսյանի թեկնածությունն առաջադրելու մասին որոշում: Ինչ վերաբերում է այս հարցում այլ կուսակցությունների, մասնավորապես` «Բարգավաճ Հայաստան»-ի հետ համագործակցությանը, ապա, ըստ Հ.Աբրահամյանի, որևէ նման պաշտոնական քննարկում չկա: «Ես բազմաթիվ առիթներով հայտնել եմ իմ ցանկությունը, անձնական տեսակետը. իմ ցանկությունն է, որպեսզի առաջիկա նախագահական ընտրություններում «Բարգավաճ Հայաստան»-ն աջակցի Սերժ Սարգսյանի թեկնածությունը»,-ասաց նա:

ԱԺ նախագահը նաև ընդգծեց, որ ՀՀԿ նախապատրաստվում է նախագահական ընտրություններին և «ոչ մեկի մասնակությունը» չի թերագնահատում:

Նա չբացառեց, որ ինքը ղեկավարի Ս.Սարգսյանի նախընտրական շտաբը` հաշվի առնելով իր «մեծ փորձը այդ ուղղությամբ», սակայն նշեց նաև, որ կուսակցությունը նման հարց չի քննարկել:

Ինչ վերաբերում է սահմանադրական փոփոխությունների հավանականությանը, ապա նա չբացառեց, որ նախագահական ընտրությունների հետ զուգահեռ անցկացվի նաև հանրաքվե` հավելելով, որ նման խոսակցություններ եղել են, բայց հարցը մանրամասն չի քննարկվել:

Հ.Աբրահամյանը նաև ողջունելի համարեց ՀՀ վարչապետի` ընդդիմադիր քաղաքական ուժերի հետ կոռուպցիայի դեմ պայքարի հարցում համագործակցելու նախաձեռնությունը: «Ես գտնում եմ, որ մենք բոլորս միասնական պետք է պայքարենք կոռուպցիայի դեմ: Այստեղ մեծ անելիք եմ տեսնում Ազգային ժողովի կողմից, քանի որ նաև օրենսդիր մարմնում են ներկայացված այդ քաղաքական ուժերը»,-նշեց նա:

Հ.Աբրահամյանը նշեց նաև. «Ազգային ժողովում, բոլորդ գիտեք, որևէ կոռուպցիա չի կարող լինել` նաև տեսական, կոռուպցիան լինում է գործադիր իշխանություններում, տեղական իշխանություններում, և որևէ մեկ օրենսդիրում փնտրել կոռուպցիա, իմ կարծիքով, նաև ճիշտ չի և անարդյունավետ է ի սկզբանե»: