Փաստ ինֆո

Կառավարությունն այսօրվա նիստում հաստատեց ՀՀ արդարադատության նախարար Հրայր Թովմասյանի բնորոշմամբ խորհրդային օրենսդրության վերջին մոհիկաններից մեկի` Վարչական իրավախախտումների վերաբերյալ ՀՀ օրենսգրքի հայեցակարգին հավանություն տալու մասին որոշումը:

1985-ին ընդունված օրենսգրքում մինչ այժմ շուրջ 130-131 փոփոխություն է կատարվել: Շուրջ 80 այլ ակտերում առկա են ՎԻՎ-ի վերաբերյալ դրույթներ, որոնք գործնականում մի շարք խնդիրներ են առաջացնում: Դրանից բացի, օրենսգրքում առկա են մի շարք դրույթներ, որոնք իրենց բովանդակությամբ վաղուց հնացել են:

«Առկա են համաչափության սկզբունքի մի շարք խախտումներ, կան դրույթներ, որոնք կրկնվում են մի շարք այլ օրենքներում, նույն արարքի համար նախատեսվում է ինչպես քրեական, այնպես էլ վարչական պատասխանատվություն»,- նշեց նախարարը: Ըստ նրա` նոր վարչական իրավախախտումների մասին օրենսգիրք ունենալը նախատեսված է հանրապետության նախագահի կողմից հաստատված 2012-2016 թթ դատաիրավական բարեփոխումների ծրագրով և նախատեսվում է մինչև 2014թ ունենալ այն:

Նախարարը տեղեկացրեց, որ մի շարք խնդիրներ են եղել, որոնք քննարկվել ու լուծում են ստացել: «Մասնավորապես, պետեկամուտների կոմիտեի հետ կապված խնդիր կար: Գործող օրենսդրությամբ այն իրավախախտումները, որոնք նախատեսված են հարկային օրենսդրությամբ, բռնագանձվող գումարները համարվում էին հարկային եկամուտներ, իրավախախտումները ՎԻՎ տեղափոխելու դեպքում գումարները մուտք կգործեն բյուջե, բայց ոչ որպես հարկային եկամուտներ»:

Արդարադատության նախարարի խոսքով` նոր օրենսգրքում նախատեսվում է վարչական պատասխանատվության այլ, նոր միջոցների կիրառում, ինչպիսին է հանրային ծառայության ներդրումը վարչական իրավախախտումներում:

Նոր օրենսգրքով նախատեսվում է նաև մի շարք վարչական պատասխանատվությունների միջև առկա հակասությունների վերացում: