Փաստ ինֆո

ՀՀ 2013 թ.-ի պետական բյուջեի նախագծով նախատեսված առողջապահության բնագավառի ծախսերը կազմում են շուրջ 70,3 մլրդ դրամ: Ծախսերի աճը 2012 թ.-ի ցուցանիշի նկատմամբ կազմում է 5,1 մլրդ դրամ կամ 7,8 տոկոս, ինչը հիմնականում պայմանավորված է 2013թ.-ի հունվարի 1-ից «Եկամտային հարկի մասին» օրենքի կիրարկմամբ, ինչպես նաև` աշխատողների ամսական աշխատավարձի նվազագույն չափը 35 հազար դրամ նախատեսմամբ:

Ինչպես ընթացիկ տարվա պետական բյուջեով, այնպես էլ 2013 թ.-ի պետական բյուջեի նախագծով առողջապահության ծախսերի ձևավորումն ունի երկու հիմնական մոտեցում` առողջապահական գերակայությունների պահպանում և սոցիալական ուղղվածության ապահովում:

Ազգային ժողովի մշտական հանձնաժողովների նոյեմբերի 1-ի համատեղ նիստում` 2013թ.-ի պետբյուջեով առողջապահության ոլորտի ֆինանսավորման հարցի քննարկման ժամանակ, նշվեց, որ ոլորտում պետության կողմից իրականացվելիք ծրագրերի հիմնական խմբերն են արտահիվանդանոցային և հիվանդանոցային, հանրային առողջապահական ծառայությունները: Նախատեսվում են բնակչության հիգիենիկ և համաճարակային անվտանգության ապահովման, բնակչության առողջության առաջնային պահպանման, մոր և մանկան առողջության պահպանման, բնակչության սոցիալապես անապահով և առանձին (հատուկ) խմբերում ընդգրկված անձանց բժշկական օգնության ապահովման, ինչպես նաև սոցիալական կախվածություն և հատուկ նշանակություն ունեցող հիվանդությունների բժշկական օգնության, այդ թվում` ՄԻԱՎ/ՁԻԱՀ-ի կանխարգելման, դեղորայքային ապահովման և այլ նպատակային առողջապահական ծրագրեր:

2013 թ.-ին նախատեսվում է Համաշխարհային բանկի աջակցությամբ իրականացնել նաև երկու նպատակային վարկային ծրագրեր` Առողջապահական համակարգի արդիականացման երկրորդ ծրագրի լրացուցիչ ֆինանսավորման ծրագիրը (ծրագրի տևողությունը` 2011-2014թ.թ.) և Առողջապահության ոլորտում հեմատոլոգիայի և օնկոլոգիայի ծրագիրը (2012-2015թ.թ.): 2013թ.-ին առաջին ծրագրով նախատեսված է 2,95 մլրդ դրամ: Երկրորդ ծրագրով, որը նախապատրաստական փուլում է, գալիք տարվա համար ծրագրված է 6,8 մլրդ դրամ: