Փաստ ինֆո

Քիչ առաջ ԱԺ-ի Էթիկայի հանձնաժողովը դռնփակ նիստում, շուրջ 3 ժամ տևած քննարկումների արդյունքում, կայացրեց որոշում, ըստ որի՝ քաղաքացի Վարդգես Գասպարիի դիմումում մատնանշած միջադեպի ընթացքում, ԱԺ ՀՀԿ խմբակցության անդամ, անկուսակցական Սամվել Ալեքսանյանը խախտել է ԱԺ պատգամավորի էթիկայի կանոնները: Այդ մասին նիստից հետո լրագրողներին հայտնեց հանձնաժողովի նախագահ Նիկոլ Փաշինյանը:

Նա նշեց նաև, որ հանձնաժողովի ամբողջական որոշումն այս պահին ինքը չի կարող հրապարակել, և դա կարվի ԱԺ-ի առաջիկա լիագումար նիստում: Ն. Փաշինյանը նաև տեղեկացրեց որ հանձնաժողովի 6 անդամներից քվեարկությանը ներկա էին 5-ը: Նրանցից 4-ը քվեարկել են որոշմանը կողմ, իսկ մեկը՝ ձեռնպահ:

«Կոնկրետ վարչական բնույթի պատժամիջոց մեր օրենսդրությամբ նախատեսվում է միայն Սահմանադրության 65-րդ հոդվածը խախտելու կապակցությամբ, երբ պատգամավորը զբաղվում է ձեռնարկատիրական գործունեությամբ: Այդ պարագայում հնարավոր է պատգամավորին մանդատից զրկել, բայց տվյալ դեպքում ընդամենը որոշումը պետք է հրապարակվի Ազգային ժողովի նիստում, և դա, ինչ-որ առումով, եթե կարող ենք այդպես ասել, բարոյական նշանակություն ունի»,-հայտնեց Ն.Փաշինյանը:

Ի պատասխան «Փաստինֆո»-ի թղթակցի հարցի, թե արդյոք ԱԺ նիստում հանձնաժողովի հրապարակվելիք այս որոշումն ընդամենն ընդունվելու է ի գիտություն, Ն.Փաշինյանն ասաց. «Ես կարծում եմ` առնվազն ԱԺ-ում և ի լուր հանրության հրապարակվելու է ԱԺ-ի էթիկայի հարցերով հանձնաժողովի որոշումը, որ պատգամավորը խախտել է էթիկայի կանոնները, և այսօրվա իրավիճակում համենայնդեպս դա այն է, ինչ օրենսդրությամբ նախատեսված է»:

Ինչ վերաբերում է նրան, որ պատգամավորը ներկա չէր նիստին, ապա, ըստ հանձնաժովովի նախագահի, նա պատշաճ ձևով ծանուցվել է նիստի օրվա, ժամի, տեղի մասին: «Կանոնակարգով իր ներկա լինելն իրավունք է, և ինքն է որոշում` օգտվել այդ իրավունքից, թե չօգտվել»,-ասաց նա: Պատգամավորը չի օգտվել նաև իր տեսակետները ներկայացնելու հանձնաժողովի տված հնարավորությունից. «Մենք երկու անգամ հրավիրել ենք պարոն Ալեքսանյանին Էթիկայի հանձնաժողով, ևս մեկ անգամ իրազեկել ենք, որ իր դիրքորոշումները կարող է ներկայացնել գրավոր կարգով: Այդ երեք առաջարկներից որևէ մեկից պարոն Ալեքսանյանը չի օգտվել»:

Այսօրվա նիստում հանձնաժողովը լսել է թե Վ.Գասպարիին, թե ոստիկանության ներկայացուցչին:

Հիշեցնենք, որ Գասպարին խնդրել էր քննել հունիսի 21-ին ԱԺ մուտքի մոտ իր և պատգամավոր Սամվել Ալեքսանյանի միջև տեղի ունեցած միջադեպի ընթացքում պատգամավորի վարքագիծը, մասնավորապես, նրա կողմից էթիկայի կանոնները խախտելու հարցը և կայացնել համապատասխան որոշում: Ռուբեն Հայրապետյանի ընտանիքին պատկանող «Հարսնաքար» ռեստորանային համալիրում ծեծի հետևանքով բժիշկ Վահե Ավետյանի մահից հետո ԱԺ մուտքի մոտ`Դեմիրճյան փողոցի կողմից, Վ.Գասպարին ի նշան բողոքի պարզել էր պլակատ` Ռ. Հայրապետյանի դեմ կարգախոսով: Ս. Ալեքսանյանը նրա ձեռքից այն խլել էր և հանձնել որոշ հեռավորության վրա կանգնած մի խումբ անձանց, որոնցից մեկը  քաշքշուկ էր հրահրել և հրելով գետնին տապալել Վ.Գասպարիին:

Ի դեպ` այս պահի դրությամբ հանձնաժողովը չունի որևէ դիմում, որի վերաբերյալ որոշում չի կայացվել: Սակայն կա մեկ այլ խնդիր. «փորձը ցույց է տալիս, որ մեր քաղաքացիներից շատերը, այնուամենայնիվ, ճշգգրիտ պատկերացում չունեն, թե ինչով է զբազվում Էթիկայի հանձնաժողովը, որովհետև երբեմն դիմում են, ասենք, փոխնախարարի, մարզպետի հետ կապված հարցերով»,-ասաց» Ն.Փաշինյանը` հավելելով, որ այսօրվա նիստում երկու քաղաքացիների դիմումներ մերժվել են հենց այդ պատճառով: