Փաստ ինֆո

«Սիբիրախտը գյուղատնտեսական կենդանիների սուր վարակիչ հիվանդություն է: Հիվանդությամբ վարակվում են բոլոր խոտակեր կենդանիները, հազվադեպ` շներն ու կատուները»,- այսօր լրագրողների հետ հանդիպման ժամանակ ասաց, ՀՀ գյուղատնտեսության նախարարի առաջին տեղակալ Գրիշա Բաղիյանը, հավելելով, որ այս հիվանդությամբ կարող է վարակվել նաև մարդը:

Գրեթե ամեն տարի հանրապետությունում արձանագրվում է 1-2 դեպք: Սիբիրախտի հարուցիչը երկու ձևով է հանդես գալիս, հիվանդությունն օրգանիզմում հանդես է գալիս որպես բացիլ, իսկ բաց դաշտում օդի հետ շփվելով նա դառնում է սպոր:

Բացիլի դեմ պայքարը հեշտ է կազմակերպել, քանի որ այն զգայուն է ջերմության նկատմամբ, իսկ սպորը ջերմակայուն է, կարողանում է երկար դիմանալ թե՛ ջերմության, թե՛ սառեցման պայմաններում: Սպորը խիտ թաղանթով պատված բջիջ է, որը ծառայում է տվյալ օրգանիզմի բազմացմանը:

«Վարդենիսի Ծովակ գյուղում դեռ սեպտեմբերին նկատվել էր կենդանիների արյան պարազիտային հիվանդություն, հիվանդության դեմ պայքար է կազմակերպվել, կատարվել են բուժումներ, իհարկե ոչ բոլոր կենդանիներն են բուժվել»,- նշեց Գրիշա Բաղիյանը, ավելացնելով, որ ըստ երևույթին արյան պարազիտային հիվանդությունն առկա էր որոշ կենդանիների մոտ, ինչի հետևանքով զգայունակությունը թուլացել է և մեկ կենդանու մսեղիքի մեջ հայտնաբերվել են սիբիրախտի բացիլներ:

Գյուղատնտեսության նախարարությունը ամբողջ հանրապետությունում 12 հիվանդությունների նկատմամբ իրականացնում է կանխարգելիչ միջոցառումներ՝ պատվաստումներ:
Գրիշա Բաղիյանի խոսքով՝ դեռ մայիսին Գեղարքունիքի մարզի բոլոր կենդանիները պատվաստվել են սիբիրախտի դեմ, սակայն հաշվի առնելով, որ մեկ կենդանու մոտ հայտնաբերվել են սիբիրախտի բացիլներ, ամբողջ գլխաքանակը նորից պատվաստվել է:

Հաշվի առնելով, որ պատվաստումից հետո 10 օր է հարկավոր իմունիտետ ձեռք բերելու համար, այդ գյուղում սահմանվել է կարանտին, արգելվել է մսամթերքի օգտագործումը:
«Այս պահի դրությամբ Վարդենիսի տարածքում սիբիրախտով վարակված կենդանիներ չկան»,- վստահեցրեց գյուղատնտեսության նախարարի առաջին տեղակալը, նշելով, որ առավոտյան և երեկոյան կենդանիները ենթարկվում են անասնաբուժական զննման:

Ըստ Գ. Բաղիյանի՝ առողջապահության նախարարությանը շուրջ 15 մարդ է դիմել՝ պարզելու, թե իրենց մոտ կա՞ այդ հիվանդությունը: Հետազոտությունների արդյունքում 1 մարդու մոտ հայտնաբերվել են սիբիրախտի բացիլներ, սակայն իրավիճակը վերահսկելի է և անհանգստանալու պատճառներ չկան:

Հնարավոր է, որ որոշ կենդանիներ դուրս են մնացել պատվաստումից կամ համապատասխան չափաբաժնով չեն պատվաստվել, Գրիշա Բաղիյանն ասաց, որ «այս առթիվ հարուցվել է քրեական գործ և համապատասխան մարմինները ուսումնասիրություններ և հետազոտություններ են կատարում»: