Փաստ ինֆո

2010 թ. ԱԺ-ի ընդունած «Գնումների մասին» ՀՀ օրենքում տեղ գտած փոփոխություններն ուժի մեջ մտան 2011 թ. հունվարի 1-ից, որը ենթադրում էր, որ համակարգի գուծունեությունը հնարավորինս թափանցիկ կդառնա:

2011 թվականի նոյեմբերից «Թրանսփերենսի Ինթերնեշնլ հակակոռուպցիոն կենտրոն» ՀԿ իրականացրած պետական գնումների համակարգի դիտարկումը, որի նպատակն էր ուսումնասիրել համակարգում առկա հիմնախնդիրները, հանգեցրել է այն եզրակացության, որ այնուամենայնիվ համակարգը շարունակում է մնալ սակավ մատչելի և թափանցիկ:

Այդ մասին այսօր հրավիրված մամուլի ասուլիսում ասաց կազմակերպության գնումների համակարգի փորձագետ Արտակ Մանուկյանը, նշելով, որ որպես թիրախային ուղղություններ ընտրվել են գնումների աջակցման կենտրոնի /ԳԱԿ/ գործունեությունը, գնումների պաշտոնական կայքը, մեկ անձից կատարվող գնումները և էլեկտրոնային գնումների համակարգը:

Ուսումնասիրությունները ցույց են տվել, որ ԳԱԿ-ը չի կատարում տվյալների վերլուծություն, այսինքն՝ չի կատարում իր գործառույթները: Բացի այդ, գնումների պաշտոնական կայքը մատչելի և թափանցիկ չէ, իսկ 2011 թ. օգոստոսից մինչ օրս չի թարմացվել:

«Սա վկայում է այն մասին, որ համակարգը շարունակում է անարդյունավետ գործել,- ասում է կազմակերպության գնումների համակարգի փորձագետ Արտակ Մանուկյանը,- իսկ բողոքների բավարարման 60 տոկոս ցուցանիշը վկայում է այն մասին, որ տեղի է ունենում մասնակիցների իրավունքների պարբերաբար ոտնահարում»:

Կազմակերպության կողմից էլեկտրոնային տարբերակով կազմակերպած գնումների ուսումնասիրությունների արդյունքում պարզվել է, որ ՀՀ-ում գործող շուրջ 140 հազար տնտեսվարող սուբյեկտներից նույն կայքում գրանցվածների թիվը կազմել է 690, որը կազմում է ընդհանուր տնտեսվարող սուբյեկտների 0,49 տոկոսը:

«Սա վկայում է այն մասին, որ մասնավոր հատվածը կամ իրազեկ չէ էլեկտրոնային գնումների համակարգին, կամ չի կարևորում այն: Բացի այդ, կայքը հնարավորություն չի ընձեռում ստանալ վիճակագրական տվյալներ կատարված գործարքների մասին»,- ասում է փորձագետը:

«Թրանսփերենսի Ինթերնեշնլ հակակոռուպցիոն կենտրոն» ՀԿ ուսումնասիրությունները ցույց են տվել նաև, որ չնայած 19 պետական կառավարման մարմիններ պլանավորել և ներկայացրել են բաց ընթացակարգով նախատեսված և էլեկտրոնային ձևով գնման ենթակա գնումների ցանկը, սակայն մեծամասամբ ցանկում չնշված մրցույթներ են իրականացվում, որն արդեն իսկ խոսում է գնումների պլանավորման վատ մակարդակի մասին:

Վերջինը, ըստ «Թրանսփերենսի Ինթերնեշնլ հակակոռուպցիոն կենտրոն» ՀԿ գործադիր տնօրեն Վարուժան Հոկտանյանի պայմանավորված է այն հանգամանքով, որ հանրապետության բուհերը համապատասխան մասնագետներ չեն պատրաստում և հետևաբար կառավարման մարմիններում մասնագիտական կարողությունների բացակայությունը հանգեցնում է համակարգի թերի աշխատանքին: