Փաստ ինֆո

Երևանի Կենտրոն և Նորք-Մարաշ վարչական շրջանների դատարանը՝ դատավոր Գագիկ Պողոսյանի նախագահությամբ, մերժել է նորածին երեխայի սպանության մեջ մեղադրվող Ալիսա Ենոքյանի պաշտպան Ամալյա Ավագյանի միջնորդությունն իր պաշտպանյալի նկատմամբ ընտրված կալանավորումը գրավով փոխարինելու մասին: Որոշումն անպայման բողոքարկվելու է վերաքննիչ դատարան:

Ինչպես «Փաստինֆո» գործակալության թղթակցի հետ զրույցում նշեց Ա.Ավագյանը, ուշագրավ է որոշման մեջ առկա հղումը՝ «դատարանը փաստում է, որ Եվրոպական կոնվենցիայի 5-րդ հոդվածի երրորդ մասի պահանջի վերաբերյալ արված իրավական մեկնաբանություններում չի արգելվում առանձին դեպքերում անձին երաշխիքով ազատ արձակելը ճանաչել անթույլատրելի, մասնավորապես, երբ առկա է անձի կողմից թաքնվելու վտանգ և կոնկրետ փաստերով հիմնավորվում է, որ այլընտրանքային երաշխիքն ի զորու չէ կանխել անձի ոչ իրավաչափ վարքագիծը նրան ազատ արձակելու դեպքում»:

Ըստ պաշտպանի, քննությունից թաքնվելու որևէ վտանգ չկա՝ մեղադրյալն ունի չորս երեխա, որից երկուսն՝ անչափահաս, երկրորդ կարգի հաշմանդամ, հիվանդ ամուսին, ծեր սկեսուր: Ավելին՝ մեղադրյալն ինքն է շահագրգռված ճշմարտության բացահայտման հարցում:

Փաստաբանը նկատեց, որ դատարան էին ներկայացվել երաշխավորագրեր Գորիսի քաղաքապետի և Հարթաշենի համայնքի ղեկավարի կողմից, ինչպես նաև Ա. Ենոքյանի այլուրեքությունը հաստատող ապացույց՝ բուժքույր Ա. Ենոքյանը 2011թ. հոկտեմբերի 7-ի առավոտյան ժամը 8.30-ից մինչև հաջորդ օրվա նույն ժամը եղել է հերթապահության Գորիսի կենտրոնական հիվանդանոցում՝ Գորիսը Հարթաշենից գտնվում է մոտ 15 կմ հեռավորության վրա: Քննիչը չի փորձել պարզել այս հանգամանքը, չի հարցաքննել Ա. Ենոքյանի հետ հերթապահած բժշկուհուն ու սանիտարին:

Ըստ մեղադրանքի, Ա. Ենոքյանը «2011թ. հոկտեմբերի 8-ին`ժամը 4-ի սահմաններում, Սյունիքի մարզի Հարթաշեն գյուղի գյուղապետ Ա. Ղ.-ի կազմակերպմամբ Աննա Մկրտչյանի ծննդաբերությունն ընդունելու և նորածնին դիտավորությամբ ապօրինաբար կյանքից զրկելու նպատակով գնացել է նույն գյուղում գտնվող Աննա Մկրտչյանի տան բակ, որտեղ նրա ծննդաբերությունից անմիջապես հետո կատարելով Ա. Ղ.-ի ցուցումները` նորածնին տարել է Աննա Մկրտչյանի տնամերձ այգի, որտեղ նորածնին ապօրինաբար կյանքից զրկելու դիտավորությամբ, վերջինիս շնչուղիները խոտազանգվածով փակելով` խեղդամահ անելու եղանակով սպանել է երեխային»: Ըստ պաշտպանի, քննությունը կանխակալ մեղադրական թեքում ունի, այս հիմքով պաշտպանը բացարկ է հայտնել քննիչին: Միջնորդությունը մերժվել է: Պաշտպանը մտադիր է նորից քննիչին բացարկի միջնորդություն ներկայացնել՝ այլ հիմքով:

Իսկ գործը նախապատմություն ունի՝ Սյունիքի մարզի ընդհանուր իրավասության դատարանում քննվում էր քրեական գործ ընդդեմ հիշյալ մարզի Հարթաշենի գյուղապետ Ա. Ղ.-ի՝ անչափահասի բռնաբարության հոդվածով: Դատաքննության ընթացքում հայտնաբերվել էր ևս մեկ տուժող՝ 21-ամյա Աննա Մկրտչյանն, ով դատարանում հայտարարել էր, որ գյուղապետը նաև իրեն է բռնաբարել, երբ ինքն անչափահաս էր: Գործով դատաքննությունը կասեցվել էր՝ մինչև անջատված մասով, որով մեղադրվում է միայն Ալիսա Ենոքյանը, քննության ավարտը:

Տուժողն, ըստ պաշտպանական կողմի, իրարամերժ ցուցմունքներ է տվել՝ նախ, որ իր մահացած նորածնի հայրը ոմն Վահագն է, ինչը հերքվել է, ապա, որ երեխայի հայրը գյուղապետ Ա.Ղ.-ն է: Տուժողը սկզբնապես դատարանում հայտարարել է, որ միայնակ է ծննդաբերել, ապա 10 օր անց ցուցմունք տվել, որ ծննդաբերության ժամանակ իրեն օգնել է հարևան Ալիսա Ենոքյանը, ով Ա. Ղ.-ի ցուցումով երեխային խեղդամահ է արել, գցել այգու խոտերի մեջ:

«Կարծում եմ, որ նախաքննական մարմինը պետք է տուժողի տեղեկությունների, բացատրությունների, ցուցմունքների արժանահավատությունը ճշտեր իմ պաշտպանյալին մեղադրանք առաջադրելուց առաջ»,- ասաց Ա.Ավագյանը: Պաշտպանը կարծում է, որ եթե ոչ մինչդատական վարույթում, ապա դատարանում մեղադրանքը փլուզվելու է:

«Փաստինֆո» գործակալությունը դիմեց ՀՀ ոստիկանությանը՝ ստանալու նաև նախաքննական մարմնի տեսակետը արծարծվող խնդիրների շուրջ, սակայն ոստիկանությունից ասացին հետևյալը. «Հիշատակված մայր գործից մաս է անջատվել, որով որպես մեղադրյալ ներգրավված Ալիսա Ենոքյանը մեղադրվում է սպանություն կատարելու մեջ»:

«Փաստինֆո»-ն պատրաստակամ է լսելու նաև մյուս կողմերի տեսակետները և շարունակելու է ուշադրության կենտրոնում պահել սույն գործը: