Փաստ ինֆո

Լոնդոնում տեղակայված «Լեգատում» վերլուծական հաստատության պատրաստած զեկույցները փոխանցվում են որևէ երկրում մասնաճյուղ բացելու մտադրություն ունեցող ընկերություններին, ինչպես նաև միջազգային հետազոտական հաստատություններին։

«Ազատություն» ռադիոկայանի փոխանցմամբ, այս տարվա զեկույցում ընդգրկված է 142 պետություն, որտեղ ապրում է մոլորակի բնակչության 96 տոկոսը և արտադրվում է աշխարհի համախառն արդյունքի 99 տոկոսը։

«Լեգատում»-ի վերլուծաբանները ցուցիչը կազմելիս հաշվի են առնում 8 գործոն` տնտեսություն, գործարարություն, կառավարում, կրթություն, առողջապահություն, անվտանգություն, անձնական ազատություն և սոցիալական կապիտալ։

Զեկույցում պետությունները դասվել են չորս կարգի` բարգավաճության բարձր, միջինից բարձր, միջինից ցածր և ցածր աստիճան։

Հայաստանը այդ ցուցիչով միջինից ցածր կարգում է և 142 պետությունների ընդհանուր ցանկում գրավել է 98-րդ տեղը։

Հայաստանի տնտեսությունն աշխարհում 129-րդն է։ Սա նշանակում է, որ 128 երկրներում ավելի արդյունավետ մակրոտնտեսական քաղաքականություն է, զարգացում և ֆինանսական սեկտորի արդյունավետություն։

Գործարարության ենթացուցիչը «Լեգատում»-ը կազմում է` հիմք առնելով գործարարի համար ստեղծված պայմանները, նրան տրվող հնարավորությունները։ Այս հարցում Հայաստանը 81-րդ երկիրն է։

Կառավարումը ենթադրում է պատասխանատու կառավարություն, արդար ընտրություններ, քաղաքական մասնակցություն և օրենքի գերակայություն։ Այդ ենթացուցիչով Հայաստանն աշխարհում 97-րդն է։

Առողջապահությամբ Հայաստանը 98-րդն է, մինչդեռ կրթությամբ, որը հաշվի է առնում կրթության մատչելիությունը, որակը և մարդկային կապիտալը, բավական բարձր` 44-րդ տեղում է։

Համեմատաբար բարվոք է համարվել նաև անվտանգությունը, որը որոշվում է պետության և անձի անվտանգությամբ. այդ ենթացուցիչով Հայաստանը 61-րդն է։

Ամենավատ ցուցանիշները վերաբերում են անձնական ազատությանը և սոցիալական կապիտալին. այդ բնագավառներում երկիրը գրավել է 122-րդ և 124-րդ տեղերը։

Անձնական ազատության ցուցիչը որոշվում է երկու հանգամանքով` անձի ազատություն և հանրային հանդուրժողականություն։

Սոցիալական կապիտալը վերաբերում է բնակչության ակտիվությանը, ներգրավվածությանը բարեգործությանը, ընտանիքների մասնակցությանը համայնքային կյանքին։
Հայաստանի հարևաններ Ադրբեջանը և Վրաստանը փոքր-ինչ ավելի լավ վիճակում են և զբաղեցնում են, համապատասխանաբար, 94-րդ և 95-րդ տեղերը, Թուրքիան 89-րդն է, Իրանը` 102-րդը։

Բարգավաճության աստիճանով ամենավատ վիճակում են Աֆղանստանը, Կոնգոն և Կենտրոնական Աֆրիկյան Հանրապետությունը։

Դե իսկ ամենաբարգավաճ երկրների առաջին եռյակում են Նորվեգիան, Դանիան և Շվեդիան։