Փաստ ինֆո

Երևանի Կենտրոն և Նորք-Մարաշ վարչական շրջանների դատարանում՝ դատավոր Մխիթար Պապոյանի նախագահությամբ, այսօր սկսվեց բանդիտիզմի գործով դատաքննությունը:

Գործով մեղադրվում են 6 անձինք: Ըստ մեղադրական եզրակացության, Արտուշ Հակոբյանը Գուրգեն Հայրապետյանի հետ միասին (վերջինս, փորձելով ազատվել ոստիկանության աշխատակիցների հետապնդումներից, դիմել էր փախուստի, որի ընթացքում, բարձրանալով Մյասնիկյան պողոտային հարակից ժայռի վրա, վայր է ընկել և մահացել) ստեղծել և ղեկավարել է կազմակերպված, զինված կայուն խումբ` բանդա, ապա բանդայի կազմում հավաքագրել Սամվել Դավթյանին, Քյարամ Ամոյանին, Արման Դալլաքյանին, Արթուր Մանուկյանին ու Դավիթ Գալստյանին և քննությամբ դեռևս չպարզված այլ անձանց:

Համաձայն նախաքննությամբ ձեռք բերված ապացույցների` Ա. Հակոբյանը 2011 թվականի մայիս-օգոստոս ամիսներին կազմակերպել և ղեկավարել է Ատոմ Ղազազյանի, Էդուարդ Բեզոյանի, Աղվան Գրիգորյանի, Նապոլեոն Ազիզյանի և նրանց ընտանիքների անդամների նկատմամբ կատարված ավազակային հարձակումները:

Նախաքննության տվյալներով մասնավորապես` Սամվել Դավթյանը և Դավիթ Գալստյանը մասնակցել են Ատոմ Ղազազյանի, Էդուարդ Բեզոյանի, Աղվան Գրիգորյանի, Նապոլեոն Ազիզյանի և նրանց ընտանիքների անդամների նկատմամբ կատարված ավազակային հարձակումներին, ինչպես նաև Կարեն Ջինանյանի և նրա ընտանիքի անդամների նկատմամբ կատարվելիք ավազակային հարձակման նախապատրաստությանը:

Կարեն Ջինանյանի և նրա ընտանիքի անդամների նկատմամբ կատարվելիք ավազակային հարձակման նախապատրաստության մեջ մեղադրվում են նաև Քյարամ Ամոյանն ու Արթուր Մանուկյանը: Վերջինս մեղադրվում է նաև իր մոտ եղած ատրճանակից ոստիկանության աշխատակիցների ուղղությամբ կրակելու մեջ:

Արման Դալլաքյանը մեղադրվում է Էդուարդ Բեզոյանի, Նապոլեոն Ազիզյանի և նրանց ընտանիքների անդամների նկատմամբ կատարված ավազակային հարձակումներին մասնակցելու մեջ:

Բացի այդ՝ կատարված խուզարկությունների արդյունքում Ա. Հակոբյանի և Դ. Գալստյանի մոտ հայտնաբերվել է մարիխուանա տեսակի, իսկ Ս. Դավթյանի և Ա. Դալլաքյանի մոտ՝ ափիոն տեսակի թմրամիջոց:

Բանդան վնասազերծվել է հերթական ավազակային հարձակումը նախապատրաստելիս, որը պետք է իրականացվեր Կարեն Ջինանյանի և նրա ընտանիքի անդամների նկատմամբ, սակայն չեն կարողացել ավարտին հասցնել իրենց կամքից անկախ պատճառներով:

5 ամբաստանյալները չընդունեցին մեղադրանքը, իսկ 6-րդը՝ ամբաստանյալ Դավիթ Գալստյանը, հրաժարվեց պատասխանել մեղադրանքն ընդունել-չընդունելու մասին դատարանի հարցերին: Նա, ի դեպ, վարքագծի համար դատական սանկցիայի էր ենթարկվել ու 36 ժամով դուրս հրավիրվել դատարանի դահլիճից, նրա դիրքորոշումն իմանալու համար դատարանը դատական նիստերի դահլիճից «արտաքսվելու» ժամկետը կրճատեց և հասցրեց մինչև երկուսուկես ժամի: Սա միակ «արտաքսումը» չէր՝ դատարանի դահլիճից մինչև նիստի ավարտը դուրս հրավիրվեց նաև «Erkir.am»-ի լրագրողը:

Ըստ դատարանի սահմանած ապացույցների հետազոտման կարգի, նախ կհարցաքննվեն տուժողները, վկաները, կհետազոտվեն գործի ապացույցները, վերջում կհարցաքննվեն ամբաստանյալները՝ ճիշտ այսպիսի հերթականություն էր առաջարկել պաշտպանական կողմը:

Մինչ դատաքննությունը սկսելը դատարանը բավարարեց փաստաբան Կարեն Հակոբյանի միջնորդությունը իր պաշտպանյալ Սամվել Դավթյանի նկատմամբ ամբուլատոր դատահոգեբուժական փորձաքննություն նշանակելու մասին:

Դատարանը հետաձգեց նույն ամբաստանյալին կրկնակի դատաբժշկական փորձաքննության ենթարկելու մասին միջնորդության քննությունը՝ մինչև գործով էական հանգամանքների պարզումը: Պաշտպան Կ.Հակոբյանը գտնում է, որ առաջին և լրացուցիչ փորձաքննությունները կատարվել են խախտումներով ու ոչ օբյեկտիվ են: Արտուշ Հակոբյանի պաշտպան Հովիկ Արսենյանն ընդգծեց, որ ոստիկանությունը վնասազերծելիս կարող է հատուկ միջոցներ կիրառել, սակայն բոլոր ամբաստանյալների ոտնաթաթերի վնասվածքները վկայում են կտտանքների մասին:

Դատարանը բավարարեց պաշտպանական կողմի միջնորդություններն ամբաստանյալներ Արտուշ Հակոբյանի, Քյարամ Ամոյանի, Սամվել Դավթյանի, Դավիթ Գալստյանի, Արման Դալլաքյանի՝ հարազատների հետ տեսակցությունների ու հեռախոսազանգերի սահմանափակումները վերացնելու մասին: Դատարանը բավարարեց Հ.Արսենյանի միջնորդությունը իր պաշտպանյալ Ա.Հակոբյանի բջջային և բնակարանի հեռախոսահամարների մուտքային ու ելքային հեռախոսազանգերի վերծանումները հեռախոսային օպերատորներից պահանջելու մասին:

Պաշտպան Հ.Արսենյանի միջնորդության հիման վրա որոշում կայացվեց նախաքննության ընթացքում իր անմեղության և այլուրեքության մասին Ա. Հակոբյանի՝ ՀՀ գլխավոր դատախազին ուղղված դիմում- բողոքները կցել գործին:

Ըստ պաշտպան Արսենյանի, գործում չկան փաստական տվյալներ առ այն, որ իր պաշտպանյալը ստեղծել և ղեկավարել է բանդա, ուստի միջնորդեց ոստիկանությունից պահանջել այդ փաստական տվյալները: Դատարանը մերժեց միջնորդությունը՝ ապացույցները կհետազոտվեն և կգնահատվեն դատարանի կողմից դատաքննության ընթացքում: Դատարանը մերժեց նաև պաշտպանի միջնորդությունը՝ պարզելու, թե ինչի կապակցությամբ է իր պաշտպանյալը հայտնվել օպերատիվ-հետախուզական մարմինների տեսադաշտում՝ օպերատիվ աշխատողների աշխատանքը գաղտնի է, և դատարանը նրանցից տվյալներ պահանջելու լիազորություն չունի:

Նոյեմբերի 5-ի դատական նիստում կսկսվի տուժողների հարցաքննությունը: