Փաստ ինֆո

Ազգային ժողովի մարդու իրավունքների պաշտպանության և հանրային հարցերի մշտական հանձնաժողովը հոկտեմբերի 29-ին կազմակերպել էր «Հայաստանի Հանրապետության ընտանեկան օրենսգրքում փոփոխություն կատարելու մասին» կառավարության կողմից օրենսդրական նախաձեռնության կարգով ներկայացված օրինագծի վերաբերյալ խորհրդարանական լսումներ:

Ինչպես նշեց հանձնաժողովի փոխնախագահ Մարգարիտ Եսայանը, նախագիծը շահագրգիռ գերատեսչությունների, հասարակական կազմակերպությունների և ազգային փոքրամասնությունների ներկայացուցիչների հետ համակողմանի քննարկելու անհրաժեշտությունը պայմանավորված է այն հանգամանքով, որ նախագծի ներկայացումից հետո հասարակության տարբեր` հատկապես ազգային փոքրամասնությունների շրջանակներում անհանգստության ալիք բարձրացավ` պայմանավորված կանանց և տղամարդկանց համար ամուսնության կնքման համար միևնույն տարիքային չափանիշի, այն է` 18 տարեկան տարիքի հասնելը, սահմանմամբ: Առաջակվող այս փոփոխությանը դեմ էր արտահայտվել հատկապես եզդիական համայնքի մի մասը` պատճառաբանելով, որ իրենք իրենց երեխաներին ավելի վաղ տարիքում են ամուսնացնում: Գործող Ընտանեկան օրենսգրքով ամուսնության կնքման համար կանանց տարիքային չափանիշ է սահմանված տասնյոթ, իսկ տղամարդկանց համար` տասնութ տարեկան տարիքի հասնելը:

Հանձնաժողովի փոխնախագահը հայտնեց, որ, երբ որոշված էր լսումներ կազմակերպելու հարցը, նախորդ շաբաթավա վերջին կառավարությունը «մի փոքրիկ անակնկալ ներկայացրեց»` օրենսդրական նոր փաթեթ, որում ընդգրկված է նաև Ընտանեկան օրենսգրքի փոփոխությունների լրամշակված տարբերակը: Ի դեպ` այս օրենսդրական նախաձեռնությունը, ի տարբերություն արդեն շրջանառվողի, կառավարության նիստում դեռևս չի քննարկվել, հետևաբար` չի ընդունվել:

ՀՀ արդարադատության փոխնախարար Արամ Օրբելյանն իր հերթին նշեց, որ նախորդ նախագծի հիմնական նպատակն էր` ի կատարումն միջազգային պարտավորությունների, սահմանել միևնույն ամուսնական տարիքի նվազագույն շեմ, վերացնելով սեռերի նկատմամբ անհավասար, խտրական մոտեցումը: Նշվեց նաև, որ հասարակության որոշ շրջանակներում առաջացած դժգոհությունները հաշվի առնելով, նախագիծը լրամշակվել է, և այն ներկայացվում է որպես այլընտրանք և խնդրի հնարավոր լուծում: Մասնավորապես, առաջարկվում է սահմանել որոշ բացառություններ: Ըստ դրանց, անձը կարող է ամուսնանալ նաև 17 տարեկանում, եթե առկա է նրա ծնողների որդեգրողների կամ հոգաբարձուի համաձայնությունը: Բացառիկ դեպքերում դատարանը, եթե դա պահանջում է անչափահասի շահը, կարող է թույլատրել անձի ամուսնությունը 16 տարեկան հասակում` վերջինի ծնողների, որդեգրողների կամ հոգաբարձուի համաձայնությամբ:

Նշենք, որ քննարկումների մասնակիցների գերակշռող մասն ընդունելի համարեց լրամշակված նախագիծը: Այդ թվում, այն ողջունեցին նաև ազգային փոքրամասնությունների ներկայացուցիչները: Մասնավորապես, «Միդիա-Շանգալ» Եզդիների ազգային միավորման խորհրդի նախագահ Ամո Շարոյանը, ով, ի տարբերություն համայնքի մի մասի, կտրականապես դեմ էր եզդիների համար օրենքով ամուսնական առանձին` ավելի ցածր տարիք սահմանելուն, համարելով դա ևս խտրական վերաբերմունքի դրսևորում, նշեց, որ իրենք համամիտ են լրամշակված տարբերակով առաջարկվող լուծումներին: