Փաստ ինֆո

ՀՀ Բնապահպանության նախարարությունը չեղյալ է համարել «Մեգաէներջի» ՍՊԸ-ին «Խաչաղբյուր-2» ՓՀԷԿ-ի կառուցման նպատակով տրամադրված բնապահպանական փորձաքննության դրական եզրակացությունը:

Հիշեցնենք, որ գետահովիտցիները դեմ էին Տավուշի մարզի Պաղջուր գետի վրա իրականացվող «Խաչաղբյուր-2» ՓՀԷԿ-ի կառուցմանը: Նրանք մի մարդու նման ոտքի էին կանգնել ՀԷԿ-ի կառուցումը կանխելու համար:

Գյուղացիների և ակտիվիստների հավաստմամբ` շինանարությունն իրականացվում էր առանց համապատասխան օրինական հիմքերի: Նրանք պահանջում էին պատասխանատվության ենթարկել բնապահպանության նախարարության այն փորձագետներին, ովքեր տվել էին «Խաչաղբյուր-2» ՓՀԷԿ-ի` շրջակա միջավայրի ազդեցության գնահատման դրական եզրակացությունը: Բնակիչները դժգոհում էին նաև, որ հասարակական լսումները կատարվել են Տավուշի մարզի Ենոքավան համայնքում, այն դեպքում, երբ կառուցվող «Խաչաղբյուր»-2 ՓՀԷԿ-ի ազդեցությունն ամբողջությամբ տարածվում է Գետահովիտ համայնքի վրա: Այսինքն` հաշվի չէին առնվել Գետահովիտ համայնքի հանրության կարծիքը:

Ապօրինությունների դեմ բնապահպանության նախարարության շենքի դիմաց հոկտեմբերի 11-ին քաղաքացիական նախաձեռնության ներկայացուցիչներ բողոքի խոշոր ակցիա կազմակերպեցին՝ պահանջելով դադարեցնել ՓՀԷԿ-ի շինարարությունը:

Քաղաքացիական նախաձեռնության ներկայացուցիչների առաջ քաշած մտահոգությունները լսելու և դրանց պարզաբանումներ տալու համար ՀՀ բնապահպանության նախարար Արամ Հարությունյանն ընդունել էր բնապահպանական ակտիվիստներին և գյուղացիներին, ինչպես նաև «Խաչաղբյուր 2» ՓՀԷԿ-ի կառուցապատողներին:

Արամ Հարությունյանը լսել էր կառուցապատող կողմի, «Բնապահպանական փորձաքննություն» ՊՈԱԿ-ի տնօրենի տեղակալ Հենրիկ Գևորգյանի և Գետահովիտ համայնքի ներկայացուցիչների փաստարկները խնդրի շուրջ: Ծավալված քննարկումների արդյունքում աշխատանքային հանդիպման ավարտին ՀՀ բնապահպանության նախարար Արամ Հարությունյանը ամփոփելով նշել էր. «Կարծում եմ, որ անհրաժեշտ է դադարեցնել ՓՀԷԿ-ի շինարարակական աշխատանքները»: Նախարարը հանձնարարել էր նախարարության աշխատակազմի ղեկավարին եռօրյա ժամկետում ստեղծել աշխատանքային խումբ՝ ներգրավելով Բնապահպանական պետական տեսչության, Ընդերքի և հողերի պահպանության քաղաքականության վարչության, Ջրային ռեսուրսների կառավարման գործակալության, «Բնապահպանական փորձաքննություն» ՊՈԱԿ-ի, ինչպես նաև բնապահպանական հասարակական կազմակերպության, ազդակիր համայնքների բնակիչներին, ովքեր խմբի ստեղծումից հետո, տասնօրյա ժամկետում պետք է ներկայացնեին խնդրի բազմակողմանի ուսումնասիրության արդյունքները: Բնապահպանության նախարարը հայտնել էր, որ նախարարությունը վճռական է հարցի արդարացի լուծման հարցում:

Հիմք ընդունելով ՀՀ Տավուշի մարզի Գետահովիտ համայնքի բնակիչների բողոքը` ՀՀ բնապահպանության նախարարի 16.10.2012թ.-ի N 254-Ա հրամանով «Մեգաէներջի» ՍՊԸ-ի «Խաչաղբյուր-2» ՓՀԷԿ-ի կառուցման հետ կապված տարաձայնություններն ուսումնասիրելու համար ստեղծված աշխատանքային խումբն առաջարկել է չեղյալ համարել «Մեգաէներջի» ՍՊԸ-ը 23.08.2012թ. տրամադրած բնապահպանական փորձաքննության դրական եզրակացությունը:

Գետահովիտ համայնքի բնակիչների արդարացի պահանջը՝ հաշվի առնվեց: