Փաստ ինֆո

Երբ ապրանքը մինչև Փոթի հասցնելը շատ ավելի թանկ է

Համաշխարհային բանկի «Doing Business» 2013 զեկույցում Հայաստանի դիրքի 18 կետով բարելավումն ու 32-րդ հորիզոնականում գտնվելը բավականին լուրջ առաջընթաց է:
Այսօր կառավարության նիստում նշեց ՀՀ վարչապետ Տիգրան Սարգսյանը:

Ըստ նրա՝ այնուամենայնիվ վերլուծությունները ցույց են տալիս, որ անելիքներ դեռ շատ կան: «Բազմաթիվ երկրների ղեկավարներ այս ինդեքսը պահում են անձնական հսկողության տակ, քանի որ այն ամփոփ նկարագրում է բիզնես միջավայրը, ցույց տալիս, թե այս կամ այն երկրում բիզնես սկսելու, բիզնեսով զբաղվելու համար իրական ինչպիսի իրավիճակ է ստեղծվում»,- նշեց վարչապետը, ավելացնելով, որ դա կարևոր հանգամանք է, քանի որ ինդեքսները գրվում են մասնավոր հատվածի շրջանում հարցումներ իրականացնելու արդյունքում:

Այս առումով ՀՀ վարչապետի կարծիքով առկա են որոշ խնդիրներ:

Առաջին՝ փոքր և միջին բիզնեսին մատուցվող ծառայությունները (ջուր, էլեկտրաէներգիա, գազամատակարարում) դեռևս ծախսատար են: Թեև իրավիճակն այստեղ բարելավվել է, սակայն «Doing Business»-ում Հայաստանը 100-ի մեջ չի մտնում:

Երկրորդ խնդիրը կապված է մաքսազերծման գործընթացի, արտաքին առևտրի, ապրանքների արտահանման հետ: Ըստ նրա՝ այս առումով Հայաստանը շատ խոցելի է. «Համաշխարհային բանկի փաստացի ուսումնասիրությունները ցույց են տալիս, որ պահանջվող տեղեկանքների քանակով դեռևս զիջում ենք մեր հարևաններին, մասնավորապես՝ անհրաժեշտ է վերացնել տարբեր տիպի փաստաթղթերի պահանջը, որ դրված է օրենսդրական կամ ոչ օրենսդրական մակարդակով»,- նշեց վարչապետը:

Ինչ վերաբերում է ծախսատարությանը, ապա ըստ նրա՝ ապրանքը մինչև Փոթի հասցնելը շատ թանկ է և դա պայմանավորված է ոչ միայն Հայաստանի ներսում, այլև Վրաստանում մինչև Փոթի հասցնելու ծախսատարության հետ: Այս ամենն էապես բարձրացնում է գործարարությամբ զբաղվելու դժվարությունը:

Ըստ Տ. Սարգսյանի՝ հաջորդ խնդիրը վերաբերում է արդարադատության ոլորտին: «Բիզնեսի շրջանակներում կատարված ուսումնասիրությունները ցույց են տալիս, որ դատական վեճերը տևում մեն մեկ տարուց ավելի: Սա շատ ցածր ցուցանիշ է»,- նշեց վարչապետը՝ Արդարադատության նախարարին հանձնարարելով իրավիճակը փոխելու վերաբերյալ առաջարկություններ ներկայացնել: