Փաստ ինֆո

Մոսկվայի Վոլոկոլամյան խճուղում գտնվող նոտարական գրասենյակի նոտար Վլադլենա Յակուշինան անշարժ գույքի առևտրի հետ կապված փաստաթղթերը նախապատրաստելու համար վերցրել է իր պահանջած գումարը, սակայն հաճախորդն այդպես էլ ոչ մի փաստաթուղթ չի ստացել: Ավելին, նոտարական պալատում նա պնդել է, որ, ընդհանրապես, նման հաճախորդի հետ ինքը գործ չի ունեցել: Սակայն այդ հաճախորդին՝ մոսկվացի Սերգեյ Օվսյաննիկովին հաջողվել է ապացուցել, որ նոտարը ստում է:

Վլադլենա Յակուշինայի գործընկերները նրան ամոթանք են տվել և… գործը դրանով կավարտվեր, եթե Սերգեյ Օվսյաննիկովը նոտարին աշխատանքից ազատելու խնդիրը չբարձրացներ դատարանում:

Դատարանում Յակուշինան հայտարարել է, որ նոտարները նման գործարքներ չեն ձևակերպում, սակայն 5000 ռուբլի վարձատրության դիմաց ինքը հանձն է առել կազմել բնակարանի առևտրի պայմանագիրը: Սակայն նոտարն, այդպես էլ, ոչ մի փաստաթուղթ չի տվել, որի հետևանքով, ինչպես հավաստիացնում է Օվսյաննիկովի փաստաբան Աննա Օրեշկովան, իր հաճախորդի 3մլն ռուբլիանոց գործարքը տապալվել է:

Երբ Մոսկվայի քաղաքային նոտարական պալատը Վլադլենա Յակուշինայի կողմից «ՌԴ գործող օրենսդրությունը խախտելու համար» բավարարվել է զգուշացում անելով, Սերգեյ Օվսյաննիկովը դա համարել է շատ մեղմ պատիժ և հայցով դիմել է Մեշչանսկի շրջանի դատարան: Իր հայցում նա նշել է, որ նոտարին պալատի կողմից արված զգուշացումը «չի համապատասխանում թույլ տված խախտումների ծանրությանը» և խնդրում է, որ պարտադրեն Մոսկվայի քաղաքային նոտարական պալատին Յակուշինային նոտարական գործունեության իրավունքից զրկելու որոշում կայացնելու համար և իր օգտին պալատից գանձեն 100 հազար ռուբլի՝ իր իրավաբանական ծառայությունների համար: Միաժամանակ նա տեղեկացրել է, որ Մոսկվայի քաղաքային նոտարական պալատը խախտել է ՌԴ նոտարների մասնագիտական վարքականոնը, որտեղ անդամներին պատժելու ձևերում «զգուշացում» հասկացությունը չկա, այլ կա դիտողությունը, նկատողությունը և խիստ նկատողությունը:

Այս անսովոր գործի վարույթը Մեշչանսկի շրջանի դատարանում կշարունակվի նոյեմբերի 29-ին: