Փաստ ինֆո

Հոկտեմբերի 24-ին Ազգային ժողովն ավարտեց «Նվազագույն ամսական աշխատավարձի մասին» օրենքում կառավարության հեղինակած փոփոխությունների քննարկումը:

Հիմնական ընդդիմախոսները խորհրդարանական ընդդիմությունն էր և «Բարգավաճ Հայաստան» խմբակցությունը:

«Ժառանգություն» խմբակցության անունից վերջինիս ղեկավար Ռուբիկ Հակոբյանը, մասնավորապես, նշեց, որ նվազագույն աշխատավարձի կառավարության կողմից 2013թ.-ի հունվարի 1-ից առաջարկվող չափը` 35 հազար դրամը, առնվազն երկու անգամ զիջում է նվազագույն սպառողական զամբյուղի չափին: Հաշվի չեն առնված նաև գնային մեծ ճնշումները, և այս օրինագծով խթանվում է արտագաղթը:

«ՀՅԴ» խմբակցության անդամ Արծվիկ Մինասյանի կարծիքով ևս, արտագաղթն աճելու է: Ըստ նրա, երկրում նվազագույն աշխատավարձի չափը սահմանելիս անհրաժեշտ է հաշվի առնել գնաճի մակարդակը, կենսաապահովման նվազագույն բյուջեն կամ սպառողական նվազագույն զամբյուղի արժեքը, ինչպես նաև միջին աշխատավարձը: Խնդրի լուծման այս մեխանիզմներից ելնելով, խմբակցության անդամները մշակել են «Նվազագույն ամսական աշխատավարձի մասին» օրենքում փոփոխություններ և լրացումներ նախատեսող օրինագիծ, որը քննարկվելու է կառավարության հոկտեմբերի 25-ի նիստում: Սակայն, ինչպես նշեց պատգամավորը, կառավարության դիրքորոշումն արդեն իսկ հայտնի է. այն դրական չէ:

«Բարգավաճ Հայաստան» խմբակցության քարտուղար Նաիրա Զոհրաբյանը նշեց, որ այս նախագծի վերաբերյալ ԲՀԿ-ի դիրքորոշումը բացասական է, սակայն մինչև քվեարկությունը խմբակցությունը ևս մեկ անգամ այն կքննարկի:

Քաղաքական մեծամասնության` ՀՀԿ խմբակցության ղեկավար Գալուստ Սահակյանն ընդգծեց, որ, իհարկե, «35 հազարով մարդիկ ապրել չեն կարող», և շատ լավ կլիներ, եթե այդ չափն ավելին լիներ, որ «ավելի շատ ուժեղ պայքարեինք ստվերի դեմ, շատ լավ կլիներ, որ ավելի մեծ բյուջե ունենայինք»:

«Ես գիտեմ մեր ընդդիմախոսների անելանելի վիճակը. եթե չքվեարկեն` կմնա նույնը, եթե քվեարկեն` սա էլ մի անտանելի բան է, իհարկե, ընդդիմության դաշտի համար»,-ասաց նա` հավելելով. «Բայց ամենապատասխանատու վիճակը մերն է, վերջին հաշվով, եթե Ձեր պատասխանատվությամբ գնանք` բարձրացնենք աշխատավարձը, Դուք չեք պատասխան տալու` մենք ենք պատասխան տալու»: Գ.Սահակյանը նշեց, որ «համենայն դեպս համամիտ լինելով» իրենց ընդդիմախոսների բազմաթիվ վերլուծությունների հետ, իրավիճակն այսպիսին է, և կոչ արեց կողմ քվեարկել: