Փաստ ինֆո

2012-ի օգոստոսի 7-ից 30-ն ընկած ժամանակահատվածում իրականացված «Կանեփ-կակաչ 2012» օպերատիվ կանխարգելիչ միջոցառման շրջանակներում ընդհանուր առմամբ հայտնաբերվել և այրման միջոցով ոչնչացվել է 82 տոննա 666 կգ կանեփի և 39 կգ կակաչի կանաչ զանգվածներ: Այդ մասին Ծաղկաձորում լրագրողների հետ հանդիպման ժամանակ նշեց ՀՀ ոստիկանության կազմակերպված հանցագործության դեմ պայքարի գլխավոր վարչության թմրամիջոցների ապօրինի շրջանառության դեմ պայքարի վարչության օպերատիվ տեղեկատվության բաժանմունքի պետ Արթուր Մինասյանը: Նրա խոսքով` տարածված է այն կարծիքը, թե Արմավիրի մարզը պետք է կանեփի «պլանտացիաներով» հարուստ լինի, մինչդեռ կանեփ ավելի շատ աճեցնում են Արարատի, Լոռու մարզերում:

Ա. Մինասյանի խոսքով` կանեփ աճեցնելն արգելված է օրենքով, կապ չունի` այն տատիկն է աճեցրել, թե թոռնիկը: Թեև որպես կանոն պարզվում է, որ կանեփն աճեցրել է ոչ թե տատիկը, այլ նրա թոռնիկը: «Ապացուցման երկարատև մեխանիզմի միջոցով պարզում ենք`կանեփն ինքն իրեն է աճել, թե այն աճեցրել են»,- նշեց պարոն Մինասյանը: Նա նաև տեղեկացրեց, որ թմրամիջոցների, հոգեմետ նյութերի և դրանց պրեկուրսորների ապօրինի շրջանառության համար այս տարի արդեն քրեական պատասխանատվության է ենթարկվել 489 մարդ: Նախորդ տարի նույն ժամանակահատվածում նրանց թիվը կազմել է 470: Այս տարի քրեական պատասխանատվության ենթարկվածներից 21-ը կանայք են, 4-ը անչափահաս, 15-ը օտարերկրացի, մեծ մասամբ Իրանի քաղաքացիներ: 2011-ին քրեական պատասխանատվության ենթարկվածներից 11-ը կանայք են եղել, վեց անչափահաս և 16 օտարերկրացի: 2012-ի 9 ամիսների ընթացքում առանց բժշկի նշանակման թմրամիջոցներ օգտագործելու համար հաշվառման է վերցվել 798 մարդ: Նախորդ տարվա նույն ժամանակահատվածում նրանց թիվը կազմել է 895: Այս տարի 798 անձանցից 62,4 տոկոսը օգտագործել են կանաբիս խմբին պատկանող թմրամիջոցներ, 34 տոկոսը՝ ափիոն և 3,6 տոկոսը սինթետիկ խմբի պատկանող թմրամիջոցներ:

ՀՀ ոստիկանության ստորաբաժանումները համագործակցելով շահագրգիռ կառույցների հետ 2012-ի ինն ամիսների ընթացքում թմրամիջոցների, հոգեմետ նյութերի և դրանց պրեկուրսորների ապօրինի շրջանառության դեմ տարվող պայքարի ուղղությամբ ձեռնարկված օպերատիվ հետախուզական միջոցառումների արդյունքում հայտնաբերել է հանցագործության 872 և վարչական իրավախախտման 236 դեպք: Ա. Մինասյանի խոսքով` նշված դեպքերը նախորդ տարվա նույն ժամանակահատվածի համեմատ նվազել են. 2011-ի առաջին ինն ամիսների ընթացքում գրանցվել է 1108 հանցագործության և 185 վարչական իրավախախտման դեպք: