Փաստ ինֆո

Ազգային ժողովը հոկտեմբերի 22-ի նիստում առաջին ընթերցմամբ ընդունեց «Պետական տուրքի մասին» օրենքում լրացում կատարելու մասին օրինագիծը:

Օրինագծով կառավարությունն առաջարկում է ՀՀ-ում մուտքի արտոնագրի ժամկետն երկարաձգելու կամ կացության կարգավիճակ ստանալու համար սահմանված պետական տուրքի գանձումից ազատել «ազգությամբ հայ այն օտարերկրյա քաղաքացիներին, որոնց մշտական բնակության օտարերկրյա պետությունում ստեղծվել է այնպիսի արտակարգ իրավիճակ, որը սպառնում է քաղաքացիների կյանքին կամ առողջությանը»:

Դեռևս նախորդ քառօրյա նիստերի վերջին օրը` հոկտեմբերի 4-ին, ներկայացնելով նախագիծը ՀՀ սփյուռքի նախարար Հրանուշ Հակոբյանն ասել էր, որ վերջին շրջանում մեծ թվով սիրիահայեր են ժամանել Հայաստան` հիմնականում 21 օր, մեկ կամ երկու ամիս ժամկետով մնալու պայմանով: Սակայն Սիրիայում ստեղծված պատերազմական իրավիճակում ՀՀ-ում գտնվող սիրիահայերի հիմնական մասը չի պատրաստվում վերադառնալ, ուստի առաջացել է նրանց` ՀՀ-ում մուտքի արտոնագրի ժամկետի երկարաձգման խնդիր:

Հ. Հակոբյանը տեղեկացրել էր, որ յուրաքանչյուր օր վիզայի երկարաձգումը արժե 500 դրամ, և եթե 10 ամիս նրանք փորձեն մնալ Հայաստանում, ապա պետք է առնվազն 150 հազար դրամի չափով պետական տուրք վճարեն, իսկ միջինացված 4 անդամից բաղկացած ընտանիքը` 600 հազար դրամ:

Նախարարը նշել էր նաև, որ նույնը վերաբերում է կացության կարգավիճակի փաստաթղթերի ժամկետի երկարաձգմանը: «Պետական տուրքի մասին» օրենքի համաձայն, այս դեպքում պետտուրքի չափը կազմում է 105-150 հազար դրամ:

«Մեր հայրենակիցների համար առավել մատչելի և հարմար պայմաններ ստեղծելու նպատակով առաջարկվում է այս օրենսդրական փոփոխությունը, սակայն օրենքում արտոնությունն ամրագրվում է ոչ միայն սիրիահայերի համար, հաշվի առնելով ծագումով հայերի տարբեր երկրներում ապրելու հանգամանքը և այդ երկրներում նրանց կյանքին վտանգ սպառնացող հնարավոր իրավիճակները,-պարզաբանել էր Հ. Հակոբյանը: