Փաստ ինֆո

Հոկտեմբերի 20-ին ուժի մեջ է մտել «Երևան քաղաքի Կոնդ թաղամասում որոշ տարածքների նկատմամբ բացառիկ` գերակա հանրային շահ ճանաչելու իրավական ռեժիմն օրենքի ուժով վերանալուց բխող միջոցառումների մասին» ՀՀ կառավարության սեպտեմբերի 27-ին ընդունած որոշումը:

Այն վերաբերում է կառավարության 2009 թ.-ի փետրվարի 2-ի «Երևան քաղաքի վարչական սահմաններում գտնվող որոշ տարածքներում բացառիկ` գերակա հանրային շահ ճանաչելու մասին» որոշման հավելվածում նշված Կոնդ թաղամասի այն տարածքներին, որոնցում սահմանված ժամկետում` մինչև 2012թ.-ի հունվարի 1-ը, սեփականության օտարման գործընթացը չի սկսվել: Այս հիմքով չիրացված սեփականության մասով բացառիկ՝ գերակա հանրային շահ ճանաչելու մասին իրավական փաստաթղթերը համարվել են անվավեր:

Ուժի մեջ մտած որոշմամբ, կառավարությունը հանձնարարել է ՀՀ կառավարությանն առընթեր անշարժ գույքի կադաստրի պետական կոմիտեի նախագահին` վերացնել չիրացված անշարժ գույքերի նկատմամբ նախկինում բացառիկ՝ գերակա հանրային շահ ճանաչելու հետ կապված սահմանափակումները:

Որոշման մեկ այլ կետով, ընդունվում է ի գիտություն, որ «Դաունթաուն Երևան» փակ բաժնետիրական ընկերությունը լուծելու է իրացված, սակայն չքանդված 70 միավոր անշարժ գույքի` 9428,62 քառ. մետր հող և 5334,13 քառ. մետր շինություն, մասով իրացման պայմանագրերը և անշարժ գույքերը սեփականության իրավունքով անհատույց օտարելու է նախկին սեփականատերերին՝ իր հաշվին կրելով գործարքների նոտարական վավերացման և ստացողի իրավունքների կադաստրային գրանցման ծախսերը:

Երևանի քաղաքապետին էլ կառավարությունն առաջարկել է որոշումն ուժի մեջ մտնելուց հետո 7-օրյա ժամկետում այն պատշաճ ձևով ուղարկել չիրացված սեփականության սեփականատերերին և չիրացված սեփականության նկատմամբ պետական գրանցում ունեցող գույքային իրավունքներ ունեցող անձանց: Նաև` լուծել «Դաունթաուն Երևան» ՓԲԸ-ի հետ Հայաստանի Հանրապետության անունից 2009 թ.-ի փետրվարի 10-ին կնքված պայմանագիրը` չիրացված տարածքների մասով: