Փաստ ինֆո

Ռուսաստանում և Հայաստանում պետական գնումների ոլորտում իրականացված ուսումնասիրությունների արդյունքում արձանագրված խնդիրները նմանատիպ են: Այդ մասին երկու երկրների Նախագահների վերահսկողական կառույցների ղեկավարների հոկտեմբերի 18-ին Երևանում կայացած հանդիպմանը հաջորդած համատեղ ասուլիսում հայտնեց ՀՀ նախագահի աշխատակազմի Վերահսկողական ծառայության ղեկավար Հովհաննես Հովսեփյանը: Նա, որպես օրինակ, նշեց, որ ռուսաստանցի գործընկերները հայտնաբերել են դեպք, երբ պետգնումների շրջանակներում ձեռք բերված մի ապրանքի գինը 300 տոկոսով գերազանցել է դրա շուկայական արժեքը:

Բանախոսները նշեցին, որ, համաձայն Հայաստանի և Ռուսաստանի Նախագահների վերահսկողական ծառայությունների միջև գործող համաձայնագրի, կազմակերպվող նմանատիպ հանդիպումները կրում են մշտական բնույթ, և պարբերաբար տեղի են ունենում թե՛ ՀՀ-ում և թե՛ ՌԴ-ում:

«Այսօրվա հանդիպման ընթացքում մենք հակիրճ անդրադարձ ենք կատարել ՀՀ նախագահի աշխատակազմի Վերահսկողական ծառայության կողմից 2012թ.-ին կատարված առավել հետաքրքիր ուսումնասիրությունների արդյունքների փոխանակման հետ կապված գործառույթներին: Մենք գտել ենք, որ դա առավել հետաքրքիր կլինի մեր գործընկերներին»,-ասաց Հ. Հովսեփյանը: Ըստ նրա, ռուսաստանցի գործընկերներն էլ ներկայացրել են իրենց կողմից ընթացիկ տարում կատարված ուսումնասիրությունների արդյունքները:

«Մեր երկու երկրներում ընթացող լայնածավալ բարեփոխումները պահանջում են, որպեսզի պետության կողմից վերահսկողական մեխանիզմներն ավելի արդիականացվեն և ավելի կատարելագործվեն: Մենք որդեգրել ենք առավել թափանցիկ և հաշվետվողական գործելաոճ, նպատակ ունենալով մեր երկրում օրենքի լիակատար գերակայությունը: Հաշվի առնելով մեր երկու երկրների միջև ձևավորված բարեկամական հարաբերությունները և կազմակերպվող հանդիպումների հաճախականությունը, մենք ակնկալում ենք մեր երկու երկրների միջև այնպիսի գործելաոճ, որն ի բարօրություն և ի շահ կլինի մեր երկու երկրների` ՀՀ-ի և ՌԴ-ի»,-ընդգծեց ՀՀ նախագահի աշխատակազմի Վերահսկողական ծառայության ղեկավարը:

ՌԴ նախագահի Վերահսկողական վարչության ղեկավար Կոնստանտին Չույչենկոն էլ հայտնեց, որ երկու երկրների միջև համագործակցությունը չափազանց սերտ է: «Պարբերական հանդիպումների ընթացքում սովորաբար քննարկվում են կառույցների գործունեության հետ անմիջականորեն կապված ընթացիկ հարցեր: Այսօր մենք աշխատելու ենք երկու երկրների ղեկավարների հանձնարարականների կատարողական կարգապահության բարձրացման ուղղությամբ: Մենք արդեն սկսել ենք քննարկումը: Օրակարգային երկրորդ հարցը վերաբերելու է պետական գնումների նկատմամբ վերահսկողությանը, որովհետև և՛ Ռուսաստանում, և՛ Հայաստանում այս ոլորտում կան խնդիրներ: Այդ իսկ պատճառով որոշել ենք այս ոլորտում ավելի սերտ համագործակցել, որպեսզի օգտագործենք յուրաքանչյուր կողմի փորձը` այդ բնագավառում վերահսկողության արդյունավետության բարձրացման նպատակով»,-նշեց Կ. Չույչենկոն: