Փաստ ինֆո

Երևանի Արաբկիր և Քանաքեռ-Զեյթուն վարչական շրջանների դատարանում շարունակվում է Կարեն Կարապետյանի անվան տակ խարդախություններ կատարած Գրիգոր Քոչարյանի վերաբերյալ քրեական գործի դատավարությունը: Գործը դատարան է ուղարկվել 2012 թ. օգոստոսի սկզբներին, անցած երկու ամիսներին տեղի է ունեցել 2 դատական նիստ: Հաջորդ նիստը նշանակված է նոյեմբերին:

Միաժամանակ զավեշտի ու ողբերգության հատկանիշներ ունեցող այս գործի հանգամանքները հետևյալն են՝ որպես «ՌԴ հայ համայնքի նախագահ Արա Աբրահամյանի» /հավանաբար խոսքը Ռուսաստանի հայերի միության և Համաշխարհային հայկական կոնգրեսի նախագահ Արա Աբրահամյանի մասին է/ քրոջ որդի Կարեն Կարապետյան ներկայացած Գրիգոր Քոչարյանը խարդախություն կատարելու դիտավորությամբ 2011թ. օգոստոսից մինչև 2011թ. դեկտեմբերն ընկած ժամանակահատվածում խաբեությամբ, բիզնեսն ընդլայնելու պատրվակով, Երևանի բնակչուհի Ա. Հ.-ից մաս-մաս վերցրել է 1.540.000 ՀՀ դրամ ընդհանուր արժողության ոսկյա զարդեր ու գումար:

Բացի այդ, ըստ մեղադրանքի, շորթման նպատակով 2011թ. դեկտեմբերից մինչև 2012թ. ապրիլի 16-ն ընկած ժամանակահատվածում Ա. Հ.-ի մասին արատավորող տեղեկություններ հրապարակելու, այն է՝ իրենց միջև սեռական հարաբերության մասին վերջինիս հարազատներին պատմելու սպառնալիքով նրանից պահանջել և ստացել է 1.304.500 ՀՀ դրամ ընդհանուր արժողության ոսկյա զարդեր ու գումար՝ Ա. Հ.-ին պատճառելով խոշոր չափի գույքային վնաս:

Ամբաստանյալը գործով տուժողի հետ ծանոթացել է 2009թ. փետրվար ամսին՝ սխալմամբ զանգահարելով նրա բջջային հեռախոսահամարին, դրան հետևել են շուրջ մեկ ամիս տևած սիրաշահող հաղորդագրությունները: Դրանից հետո սկսվել են ընկերական հարաբերություններ և տևել շուրջ երկուսուկես տարի, մեղադրյալն անգամ ծանոթացել է տուժողի հարազատների հետ՝ ներկայանալով որպես նրանց դստեր ապագա ամուսին: Գ. Քոչարյանը սկսում է նախ գումարներ խնդրել, ապա նրա տոնայնությունը փոխվում է՝ նա արդեն պահանջում է գումար լռության դիմաց մինչև պարզվում է նրա՝ Մալիշկա գյուղի բնակիչ Գրիգոր Քոչարյանի ինքնությունը, այդ ժամանակ տուժողը դիմում է ոստիկանություն:

ՀՀ քրեական օրենսգրքի 178 հոդվածի 2-րդ մասի 2-րդ կետով՝ Խարդախություն և 182-րդ հոդվածի 2-րդ մասի 3.1 կետով՝ Շորթում, առաջադրված մեղադրանքում նախաքննության ընթացքում մեղադրյալն իրեն մեղավոր է ճանաչել մասնակի և տվել, նախաքննական մարմնի որակմամբ, իրականությանը չհամապատասխանող ցուցմունքներ:

Վարույթն իրականացնող մարմինը գտնում է, որ նրա ցուցմունքներն անհիմն են, մտացածին, հետապնդում են քրեական պատասխանատվությունից ու պատժից խուսափելու նպատակ և հերքվում են իր իսկ՝ Գ. Քոչարյանի մասամբ խոստովանական ցուցմունքներով առ այն, որ թաքցրել է իր իրական անունը և տուժողից ստացել մոտ 7000 դոլար արժողության գումար և ոսկյա զարդեր, որոնք մինչ օրս չի վերադարձրել: