Փաստ ինֆո

Մոտ օրերս ՀՀ նախկին արտգործնախարար, ԱԺ պատգամավոր Վարդան Օսկանյանի պաշտպան, փաստաբան Տիգրան Աթանեսյանը կներկայացնի միջնորդություն  փողերի լվացման  հատկանիշներով  հարուցված գործը կարճելու մասին:   

Այդ մասին լրագրողների հետ այսօրվա հանդիպմանը հայտարարեց Տ. Աթանեսյանը:  Գործը որևէ հեռանկար, այդ թվում՝ դատական,  չունի,  ուստի պաշտպանի կարծիքով, միակ ելքը այն կարճելն է:    

Պաշտպանը դիմումում  ցույց կտա իրավաբանական գիտության մեջ առկա կարծիքները հափշտակության և փողերի լվացման հանցակազմերի մասին,  ինչպես նաև կներկայացնի մնացած փաստական հանգամանքները, որոնք, նրա գնահատմամբ,  սխալ են մեկնաբանվում:   

Մասնավորապես,  և՛  ՀՀ  գլխավոր դատախազի միջնորդագրում,  և՛  քննիչների որոշումներում  «կարմիր թելով»  անցնում է մի միտք, ըստ որի  Վ.Օսկանյանը  պետք է անմիջապես փոխանցեր գումարը, քանի որ դա նախատեսված էր «Սիվիլիթաս»-ի ներկայացուցիչ Տիգրան Կարապետյանի և Հանթսմանների միջև կնքված պայմանագրով: Վերջինս, փաստաբանի գնահատմամբ,  քաղաքացիա-իրավական երևույթ է և պարտադիր է երկու կողմերի համար. «Եթե  պրն. Օսկանյանը   չի ստորագրել այդ պայմանագիրը կամ տեղյակ չէ,  ինչպե՞ս կարող է դա իր համար պարտադիր լինել»,- ասաց նա՝ հավելելով, որ եղել է բանավոր պայմանավորվածություն  գումարները Վ. Օսկանյանի հայեցողությամբ  տնօրինելու մասին:

Դատախազին Վ. Օսկանյանին որպես մեղադրյալ ներգրավելու որոշման բողոքարկելը  պաշտպանն անիմաստ  է համարում՝  մեղադրանքը դատախազն  ու նախաքննական մարմինը միասին են  գրում և նախապես համաձայնեցնում  դատախազության հետ, իսկ դատարաններում այն բողոքարկելը կհանգեցնի մերժման:  «Եվ կստացվի,  որ դատարանները նախապես կհաստատեն,  որ մեղադրանքը ճիշտ է»,- ասաց նա:

Իր արտահայտությամբ,  «Վճռաբեկ դատարանի անքննելի ջրհորդան ներում» գտնվող  դիմումից, որով Վ. Օսկանյանը դեռևս որպես վկա բողոքարկել  է ԱԱԾ-ի կողմից քրեական գործ հարուցելու որոշումը,  կողմը ակնկալիքներ չունի:  «Սպասում ենք դիմումը վերադարձնելու որոշում,  մեր Վճռաբեկ դատարանը ուրիշ ոչինչ չի հաստատում»:
Անդրադառնալով իր պաշտպանյալի կողմից ցուցմունք տալուց հրաժարվելու հարցին՝  Տ. Աթանեսյանը նշեց. «Այս երկրում ոչ ոք չի վստահում նախաքննության մարմնին»: Նա հավելեց, որ «երբ պարզ դարձավ, որ քրեական հետապնդումը իրականում քաղաքական հետապնդում է,  պրն Օսկանյանը հրաժարվեց ցուցմունք տալուց»:  Պաշտպանական կողմը որդեգրել է սովորական մարտավարություն՝   միջնորդությունների միջոցով  ի ցույց դնել  «չակերտավոր ապացույցների ողջ սնանկությունը»:

ԱԺ ՀՀԿ խմբակցության ներկայացուցիչների հայտարարությունները, թե Վ.Օսկանյանը պետք է ապացուցի իր անմեղությունը, նրա գնահատմամբ, պարզապես իրավական անգրագիտություն է: «Երևի այդ խմբակցությունում շատ կան մարդիկ, ովքեր օր ու գիշեր մտածում են, երբ որ օրը գա ինչպես են ապացուցելու իրենց անմեղությունը, երևի սեփական վախերը վերագրում են պրն Օսկանյանին»:

Հիշեցնենք, որ այդ հարցի վերաբերյալ գլխավոր դատախազը դեռ խորհրդարանում արտահայտել էր իր դիրքորոշումը. «Ինչ վերաբերում է երեկ բազմիցս նշված անմեղության կանխավարկածի սկզբունքի խախտման վերաբերյալ պատգամավորների եզրահանգումներին, ապա ոչ ոք չի ժխտում, որ Վ. Օսկանյանի անմեղությունն ապացուցվելու է դատավարական կարգով, որ մեղադրանքն ապացուցում է մեղադրող կողմը, և որևէ մեկը չի պնդում, որ Վ.Օսկանյանն ինքը պարտավոր է ապացուցելու իր անմեղությունը: Ընդ որում, հանրահայտ է, որ անձը անմեղ է, քանի դեռ նրա մեղավորությունն ապացուցված չէ օրենքով uահմանված կարգով` դատարանի` oրինական ուժի մեջ մտած դատավճռով: Սույն միջնորդագրով Վ. Օսկանյանը ոչ թե մեղավոր է ճանաչվում, այլ ներգրավվելու է որպես մեղադրյալ քրեադատավարական նորմերի պատշաճ իրավական ընթացակարգի շրջանակներում»:

Ավելացնենք, որ ըս ՀՀ Սահմանադրության 21-րդ հոդվածի, «Հանցագործության համար մեղադրվողը   համարվում է անմեղ, քանի դեռ նրա մեղավորությունն ապացուցված չէ օրենքով սահմանված կարգով՝  դատարանի օրինական ուժի մեջ մտած դատավճռով» և  «մեղադրյալը պարտավոր չէ ապացուցել իր անմեղությունը: Չփարատված կասկածները մեկնաբանվում են հօգուտ մեղադրյալի»: