Փաստ ինֆո

134 բուժհաստատությունների գնումների գործընթացների ուսումնասիրման արդյունքում պարզվել է, որ դրանցից 100-ը մրցույթներ չեն իրականացրել, իրենք են որոշել, թե որտեղից գնումներ կատարեն: Բոլոր այն դեպքերում, երբ մրցույթներ չեն կազմակերպվել, կատարվել են միակողմանի գործարքներ, պարզվել է, որ տվյալ ապրանքի համար վճարված գինը շատ ավելի բարձր է եղել, քան իրական արժեքն է:

Այդ մասին այսօր տեղի ունեցած խորհրդակցության ընթացքում նշել է ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:

Նա տեղեկացրել է, որ բազմաթիվ դեպքեր են բացահայտվել, երբ առողջապահության բնագավառի տնտեսվարողները հակամրցակցային գործողություններ են իրականացրել, ինչի հետևանքով մի շարք տնտեսվարողներ ենթարկվել են պատասխանատվության:

«Ուսումնասիրությունները ցույց են տալիս, որ շատ դեպքերում բուժհաստատությունները գնումներ կատարելիս օրենքով սահմանված կարգով մրցույթներ չեն անցկացնում՝ կոպտորեն խախտելով գնումների օրենսդրական պահանջը»,- ասել է Արտակ Շաբոյանը:

Դիմելով խորհրդակցությանը ներկա բուժհաստատությունների ղեկավարներին՝ վարչապետ Սարգսյանը նշել է. «Մենք ակնկալում ենք, որ դուք այսուհետ ներկայացնելու եք աշխատավարձերի իրական պատկեր և բուժհաստատություններում մենք կտեսնենք աշխատավարձերի աճ: Բուժհաստատությունների բուժանձնակազմերը դա են սպասում:

Պետք է հրաժարվեք ստվերային աշխատավարձերի վճարումից: Մեր ուսումնասիրությունները ցույց են տալիս, որ աշխատավարձերի կտրուկ աճ պետք է տեղի ունենա: Մարդկանց օրինական աշխատավարձ պետք է տալ:

Այն բուժհաստատությունները, որոնք կընկնեն ռիսկային ցանկերում՝ կզրկվեն պետական ֆինանսավորումից, պետական պատվերից: Այն բուժհաստատությունները, որոնք լինելու են ռիսկայինների ցանկում՝ նրանց նկատմամբ առողջապահության նախարարությունը ստուգումներ կիրականացնի՝ որակական հատկանիշների համապատասխանելիության վերաբերյալ, ինչի հետևանքով շատերը կզրկվեն առողջապահական ծառայություններ մատուցելու լիցենզիաներից:

Մի ստիպեք, որպեսզի մենք կազմենք ռիսկային հիմնարկների ցուցակ և հարկերից չարամտորեն խուսափելու ստուգումներ իրականացնենք: Այսօր մենք չենք ուզում դիպչել այդ գործիքին, չենք ուզում կիրառել քրեական հոդվածներ, բայց դաշտում պարտավոր ենք էապես կրճատել ստվերայնությունը:

Պարոն Դումանյան, այս բոլոր զեկույցները նշանակում են, որ Դուք ունեք վճռական գործողությունների հնարավորություն: Դուք ունենալու եք Կառավարության բոլոր գերատեսչությունների աջակցությունը և կարող եք համակարգում վճռական քայլեր իրականացել: Այդ քայլերում մենք Ձեզ սատարելու ենք»:

ՀՀ առողջապահության նախարար Դերենիկ Դումանյանը շնորհակալություն է հայտնել գործադիրի ղեկավարին իր գլխավորած համակարգի նկատմամբ ցուցաբերած ուշադրության համար և հավաստիացրել, որ ներկայացված բոլոր խնդիրները կգտվեն իր ուշադրության կենտրոնում: Նախարարը վստահեցրել է, որ կվերլուծեն ներկայացված փաստերը և կարվեն համապատասխան հետևություններ: