Փաստ ինֆո

Օգոստոսի 31-ից Ազգային ժողովում պաշտոնական շրջանառության մեջ է դրված «Ժառանգություն» խմբակցության անդամների կողմից օրենսդրական նախաձեռնությամբ ներկայացված` ԱԺ ժամանակավոր հանձնաժողով ստեղծելու մասին որոշման նախագիծը:

Ըստ նախաձեռնողների, ստեղծվելիք հանձնաժողովը պետք է ուսումնասիրի «Հարսնաքար» ռեստորանային համալիրում ՀՀ պաշտպանության նախարարության մի խումբ սպաների դաժան ծեծի ենթարկելու, նրանցից մեկին կյանքից զրկելու հանգամանքների, ինչպես նաև 2001 թ.-ի սեպտեմբերի 25-ին Երևանի «Առագաստ» սրճարանում տեղի ունեցած Պողոս Պողոսյանի սպանությունից հետո «առավել արմատավորված անպատժելիության ու ամենաթողության համար պատասխանատու և մեղսակից գործող ու պաշտոնաթող բարձրաստիճան պաշտոնյաների, նրանց հետ առնչություն ունեցող անձանց մասնակցությամբ տեղի ունեցած կյանքի և առողջության դեմ հանցագործությունները» և Ազգային ժողովին եզրակացություն ներկայացնի:

Նշենք, սակայն, որ ՀՀ Ազգային ժողովի աշխատակազմի իրավաբանական վարչությունը փորձաքննության է ենթարկել նախագիծը և սեպտեմբերի 7-ին ներկայացրել իր բացասական եզրակացությունը. «Նախագիծն իրավական տեսանկյունից հակասում է ՀՀ Սահմանադրության 73-րդ հոդվածի 3-րդ մասին, համաձայն որի` «Անհրաժեշտության դեպքում Ազգային ժողովի կանոնակարգ օրենքով սահմանված կարգով կարող են ստեղծվել ժամանակավոր հանձնաժողովներ` առանձին օրենքների նախագծերի նախնական քննարկման կամ որոշակի հարցերի, իրադարձությունների և փաստերի մասին Ազգային ժողովին եզրակացություններ, տեղեկանքներ ներկայացնելու համար»:

Ըստ եզրակացության, Սահմանադրությունը և «Ազգային ժողովի կանոնակարգ» օրենքը, որպես վերահսկողական մեխանիզմ, բացառում են «հանցագործությունների ուսումնասիրության» նպատակով հետաքննության և քննչական գործողություններ կատարող հանձնաժողովներ ստեղծելու հնարավորությունը:

Հոկտեմբերի 9-ին ընդդիմադիր մյուս` «Հայ ազգային կոնգրես» խմբակցության անդամների կողմից ԱԺ պաշտոնական շրջանառության մեջ է դրվել նաև մեկ այլ` «2008թ. մարտի 1-2-ին Երևան քաղաքում տասը անձանց սպանությունների, քաղաքացիական անձանց, ոստիկանության աշխատակիցներին ու զինծառայողներին հրազենային ու այլ մարմնական վնասվածքներ պատճառելու դեպքերով ՀՀ ոստիկանության, Հատուկ քննչական ծառայության և ՀՀ գլխավոր դատախազության ձեռնարկած միջոցառումների ու գործողությունների հիմնավորվածության և օրինականության հարցը ուսումնասիրող ՀՀ Ազգային ժողովի ժամանակավոր հանձնաժողով ստեղծելու մասին», որոշման նախագիծ:

Այս նախագծի վերաբերյալ դեռևս պաշտոնական եզրակացություն չկա, սակայն ԱԺ քաղաքական մեծամասնության տարբեր ներկայացուցիչներ վերջին օրերին հրապարակավ հայտնել են իրենց բացասական դիրքորոշումները:

Նախաձեռնության հեղինակները նոր ժամանակավոր հանձնաժողովի ստեղծման անհրաժեշտությունը հիմնավորում են, մասնավորապես, այն հանգամանքով, որ «մարտի 1-2-ի դեպքերի ուսումնասիրման նպատակով Ազգային ժողովի 2008թ.-ի հունիսի 16-ին ստեղծված հանձնաժողովը և նրա կազմած եզրակացությունը այդպես էլ չարժանացան սպանվածների հարազատների, կառավարող կոալիցիայից դուրս գտնվող հայաստանյան քաղաքական ուժերի, հասարակության լայն շերտերի հավանությանը: Այդ եզրակացությունը չբավարարեց նույնիսկ ԵԽԽՎ մոնիտորինգի խմբի համազեկուցողներին: Այն գնահատվեց մարտի 1-2-ի դեպքերի որպես միակողմանի մեկնաբանություն և քիչ վստահելի»: