Փաստ ինֆո

2013թ.-ի հունվարի 1-ից կգործի եկամտահարկի հաշվարկման նոր մեխանիզմ: Այն չպետք է դիտարկել որպես առանձին բարեփոխում, քանի որ բխում է կենսաթոշակային բարեփոխումների պահանջներից:

«Նորամուծությունն այստեղ այն է, որ նախկին եկամտահարկը, ինչպես նաև աշխատողի սոցիալական ապահովության վճարը և գործատուի կողմից վճարվող սոցիալական ապահովության վճարը, որպես առանձին հաշվարկվող պարտավորություններ, այլևս չեն լինելու: Դրանց փոխարեն գործածության մեջ է դրվելու մեկ միասնական եկամտային հարկը, որը միավորում է այդ երեքը: Բոլոր գործատուները պետք է այսօրվա գործող պայմանագրային աշխատավարձին ավելացնեն ներկայիս սոցիալական ապահովության վճարը (թե´ աշխատողի, թե´ գործատուի) և եկամտային հարկը հաշվարկեն այդ համախառն ընդհանուր գումարից»,- ասաց «Կենսաթոշակային համակարգի իրազեկման կենտրոն» հիմնադրամի տնօրեն Արտակ Ղազարյանը` հավելելով, որ եկամտային հարկի փոփոխությունը կատարվել է երեք սկզբունքների հիման վրա: Առաջին` աշխատող քաղաքացու փաստացի եկամտի չափը չի պակասելու, երկրորդ` չեն նվազելու պետական բյուջեի եկամուտները, և երրորդ` գործատուների համար լրացուցիչ հարկային բեռ չի առաջանալու:

«Եկամտային հարկի մասին» ՀՀ օրենքի 25-րդ հոդվածի, ինչպես նաև Կառավարության համապատասխան որոշումների դրույթների համաձայն` այս փոփոխության հետևանքով աշխատողի մաքուր աշխատավարձը չի նվազելու, մնալու է անփոփոխ: Եթե լինեն գործատուներ, ովքեր կփորձեն ինչ-որ մեխանիզմներով աշխատողի կողմից փաստացի տնօրինվող եկամուտը կրճատել, ապա ըստ 25-րդ հոդվածի 6-րդ կետի, նրանք ստիպված կլինեն վճարել լրացուցիչ հարկ, որը գործատուների համար, բնականաբար, բոլորովին ձեռնտու չէ:

«Նորություն է նաև եկամտային հարկի հաշվետվությունները բացառապես էլեկտրոնային եղանակով հարկային մարմին ներկայացնելու կարգը: Իհարկե, մինչ այս փոփոխությունները ևս կային գործատուներ, որոնք էլեկտրոնային հաշվետվություններ էին ուղարկում` կամավորության սկզբունքով, սակայն այսուհետ բոլոր գործատուների համար այս պահանջը պարտադիր է»,- նշեց Արտակ Ղազարյանը:

2013թ. հունվարից հարկային մարմինն այլևս թղթային հաշվետվություններ չի ընդունելու: Հաշվետվությունները պետք է լինեն էլեկտրոնային, այսինքն՝ հաստատված էլեկտրոնային ստորագրությամբ:

Արտակ Ղազարյանի խոսքով՝ այս պահին գործատուների համար առաջնային խնդիրներից մեկը էլեկտրոնային ստորագրություն ձեռք բերելն է, առանց որի հաշվետվություններ ներկայացնել չեն կարող:

«Կենսաթոշակային համակարգի իրազեկման կենտրոն» հիմնադրամի տնօրենը գործատուներին կոչ արեց ժամանակ չկորցնել և դիմել համապատասխան անձնագրային բաժին` էլեկտրոնային ստորագրություն ստանալու համար:

Արտակ Ղազարյանը շեշտեց, որ սա ինքնանպատակ նորամուծություն չէ, հաշվետվությունների օնլայն ներկայացումը կենսաթոշակային բարեփոխումները նախապատրաստող ամենակարևոր քայլերից մեկն է:

«Խնդիր է դրված, որ հանրապետությունում գործող բոլոր ակտիվ հարկատուները ձեռք բերեն համապատասխան գիտելիքներ` հաշվետվությունների օնլայն ներկայացումն ապահովելու համար, իսկ մենք ունենք մոտ 75000 ակտիվ գործատու, որից 28000-ը` իրավաբանական անձինք են, իսկ 47000-ը` անհատ ձեռներեցներ, որոնց մոտ կեսը գրանցված են մարզերում: Տվյալ դեպքում խոսքը միայն այն անհատ ձեռներեցների մասին է, ովքեր ունեն վարձու աշխատողներ»:

Իսկ թե ի՞նչ արժե էլեկտրոնային ստորագրությունը և քանի՞ ստորագրության կարիք կա, «Pastinfo.am»-ի թղթակցի հարցին՝ Արտակ Ղազարյանը պատասխանեց, որ «Էլեկտրոնային ստորագրության սպասարկման տարեկան վճարը 3000 դրամ է, ևս 3000 դրամ արժե ID քարտը»:

Այն գործարարները, ովքեր էլեկտրոնային ստորագրությունը ձեռք կբերեն մինչև նոյեմբերի 30-ը, կվճարեն միայն ID քարտի համար:

Էլեոնորա Առաքելյան